विद्यालय शिक्षा ऐन जारी गर्न माग गर्दै काठमाडौँमा शिक्षकहरूको प्रदर्शन
काठमाडौं,चैत २० । विद्यालय शिक्षा ऐन जारी गर्न माग गर्दै शिक्षकहरूले प्रदर्शन गरेका छन् । बुधवार काठमाडौँको माइतीघर देखी बानेश्वरसम्म शिक्षकहरूले प्रदर्शन गरेका हुन् ।
शिक्षकहरूले ‘विद्यालय शिक्षासम्बन्धी कानुन संशोधन र एकीकरण गर्न बनेको विधेयक २०८०,जारी गर्, हाम्रो आन्दोलन जारी छ, विगतका सम्झौता कार्यान्वयन गर् लगायत नारा लगाउँदै विरोध प्रदर्शन गरे।
नेपाल शिक्षक महासंघका अध्यक्ष लक्ष्मीकिशोर सुवेदीले राज्यले विद्यालय शिक्षा ऐन जारी गर्न आलटाल गरेको भन्दै तत्काल जारी गराउनका लागि दबाब दिनलाई फेरि आन्दोलन थालेको जानकारी दिए। उनले यो आन्दोलन अनिश्चितकालीन रहने बताए।
उनले भने,‘यो हाम्रो दोस्रो चरणको अन्तिम र निर्णायक आन्दोलन हो,‘काठमाडौं जाऔँ अभियान’ अघि बढाएर यतिखेर विरोध प्रदर्शन गरिरहेका छौँ,आजबाट सुरू भएको यो अनिश्चितकालीन शैक्षिक सडक आन्दोलन हो, अबदेखि आन्दोलन रोकिँदैन,यहाँ देशभरका शिक्षक, कर्मचारीको सहभागिता छ।’
शिक्षक महासङ्घको आयोजनामा भएको प्रदर्शनमा काठमाडौँका विभिन्न स्थानबाट निस्किएको र्याली माइतीघरमा पुगेर धर्नामा परिणत भएको हो ।