छहरे–टोखा सडकखण्डमा प्राङ्गारिक कृषि सामग्री बिक्री केन्द्र तथा खाजाघर सञ्चालन
नुवाकोट,चैत १९ । छहरे–टोखा सडकखण्ड अन्तर्गत शिवपुरी गाउँपालिका वडा नम्बर ८ थानापतीमा स्थानीय व्यवसायी रामप्रसाद पुडासैनीले विभिन्न सहकारीबाट संकलित दूध प्रयोग गरी दुग्धजन्य मिठाइ उत्पादन तथा बिक्री सुरु गरेका छन्। साथै, उनले प्राङ्गारिक कृषि सामग्री बिक्री केन्द्र तथा खाजाघर सञ्चालन गरी स्थानीय उत्पादनलाई प्रवर्द्धन गर्ने प्रयास गरेका छन्।
स्थानिय जागरुक कृषि सहकारी संस्थाबाट संकलित ताजा दूधको प्रयोग गरी रसबरी, पेढा, बर्फी, कलाकन्दजस्ता परिकारहरू उत्पादन गरिदै आएको छ । गुणस्तर तथा स्वच्छतामा ध्यान दिँदै तयार गरिएका यी मिठाइहरू उपभोक्ताहरू माझ पछिल्लो समय लोकप्रिय समेत बन्दै गएको खाजाघर व्यवस्थापक बिमल पाण्डेले बताए ।
त्यसैगरी, कृषि सामग्री बिक्री केन्द्र तथा खाजाघरमा जैविक तरकारी, फलफूल, अन्न, मसला, कोदो, फापरबाट बनेको ढिडो तथा अन्य प्राङ्गारिक लोकल उत्पादनहरू उपलब्ध छन्। खाजाघरमा यस सडकखण्ड हुँदै आवतजावत गर्ने यात्रुहरू तथा स्थानीय बासिन्दाहरूका लागि पौष्टिक तथा स्वादिष्ट परिकारहरू उपलब्ध छन्।
पाण्डेका अनुसार, यो व्यवसायले स्थानीय किसान, दुग्ध उत्पादक तथा सहकारी संस्थाहरूलाई प्रत्यक्ष रूपमा फाइदा पुर्याउनेछ। स्थानीय निकाय तथा कृषि व्यवसायीहरूको सहकार्यमा सञ्चालन गरिएको यस परियोजनाले कृषि तथा दुग्ध व्यवसायलाई प्रोत्साहन गर्दै स्थानीय अर्थतन्त्रलाई सबल बनाउने अपेक्षा गरिएको छ।
सोमबार भएको उद्घाटन सत्रमा शिवपुरी गाउँपालिकाका अध्यक्ष गोविन्दप्रसाद थपलियाले वैदेशिक मानसिकता बोकेका युवाहरूलाई यसप्रकारको कार्यले गतिलो सन्देश दिने बताए । गाउँपालिकाका उपाध्यक्ष बीरबहादुर तामाङले युवा पुस्ताको यसप्रकारको कार्यलाई प्रोत्साहन र पुरस्कृत गरिने बताए । कार्यक्रममा राजनीतिकर्मी पदम उप्रेती, वडा अध्यक्ष केशवराज रिजाल, विभिन्न सहकारीका प्रतिनिधि, कृषक लगायतको उपस्थिति रहेको थियोे ।
भिडियो हेर्नुस्