राजावादीहरुको हिंसात्मक प्रर्दशन, प्रेस चौतारी नेपालले बुझायो ज्ञापन पत्र

काठमाडौं,चैत १७ । प्रेस चौतारी नेपालले सञ्चार तथा सूचना प्रविधि मन्त्री पृथ्वीसुब्बा गुरुङ समक्ष कथित राजावादी समुहको नाममा चैत १५ गते काठमाडौँमा भएको अराजकपुर्ण हिंसात्मक प्रर्दशनबारे उल्लेख गर्दै सत्यतथ्य छानविन गरि दोषिलाई कारवाही गर्न ज्ञापन पत्र बुझाएको छ ।

प्रेस चौतारीका नव निर्वाचित अध्यक्ष गणेश पाण्डे सहितको टोलीले आज मन्त्रालयमा मन्त्री समक्ष ज्ञापन पत्र बुझाएको हो ।

ज्ञापन पत्र अनुसार चैत १५ गते काठमाडौंमा भएको अराजकतापूर्ण र हिंसात्मक प्रदर्शनका क्रममा समाचार संकलनमा रहेका पत्रकारको ज्यान गुमेको र पत्रकार तथा सञ्चारमाध्यममाथि सुनियोजित रुपमा आक्रमण भएको घटनाले नेपाली श्रमजीवी पत्रकारहरूको सवैभन्दा ठूलो संगठन प्रेस चौतारी नेपाल स्तब्ध बनेको उल्लेख छ ।

प्रदर्शनका क्रममा भएका आतंकपूर्ण र हिंसात्मक घटनाले सिंगो सञ्चार क्षेत्र त्रसित र मर्माहत भएको उल्लेख गर्दै सञ्चारमन्त्रीले सत्यतथ्य पत्ता लगाई दोषिमाथि यथासिग्रह कारवाही प्रक्रिया अगाडी बढाउन माग गरिएको छ ।

ज्ञापन पत्रमा काठमाडौंको तीनकुनेमा प्रदर्शनकारीले हिंसात्मक ढंगले निजी भवनमा आगजनी गर्दा सोही भवनको माथिल्लो तलामा बसेर समाचार छायांकन गरिरहेका एभिन्यूज टेलिभिजनका पत्रकार सुरेश रजकको कार्यस्थलमै जलेर मृत्यु भएको, आन्दोलनकारीले लुटपाट गरेको भिडियो सार्वजनिक हुने डरले रजकलाई आगो लागेको भवनमै थुनेर बाहिर निस्केको विवरणहरू आइरहेका उल्लेख छ ।

घटनापछि प्राप्त दृष्यहरूले उहाँको सुनियोजित रुपमै हत्या गरेको गम्भीर आशंका उब्जाएको छ । कार्यस्थलमै एक जना पत्रकारले जिउदै जलाएर ज्यान लिने र पत्रकारले मृत्युवरण गर्नुपर्ने कहालीलाग्दो र आततीय घटनाको छानबिन गरी दोषीमाथि कडा भन्दा कडा कारबाही गर्न सरकारसँग माग गरिएको ज्ञापन पत्रमा उल्लेख छ । साथै, मृतकका परिवारलाई न्याय, राहत तथा परिपूरणको व्यवस्था गर्न आग्रह समेत प्रेस चौतारीले गरेको छ ।

त्यस्तै, राज्यबाट इजाजत लिएर सञ्चालन भइरहेको एभिन्यूज टेलिभिजनलगायतका सञ्चारमाध्यमका सञ्चालक र केही सञ्चारकर्मीले चैत १५ गतेको हिंसात्मक आन्दोलनमा ऐक्यबद्धता जनाउँदै प्रतिगमनलाई मलजल गर्ने गरी संविधानविपरीत समाचार सामाग्री प्रकाशन ÷ प्रशारण तथा संघीय लोकतान्त्रिक गणतन्त्रको विरुद्धमा मिडिया परिचालन गरिरहेको अवस्था छ । मृतक रजकको हत्याको घटनामा सम्बन्धित टेलिभिजनका सञ्चालकलाई पनि जवाफदेही बनाउन तथा मृतक रजकले पाउन बाँकी तलब तथा श्रमजीवी पत्रकार ऐनअनुसार पाउनुपर्ने सम्पूर्ण सेवा, सुविधा उपलब्ध गराउन टेलिभिजन व्यवस्थापनलाई कानुन अनुसार बाध्यकारी बनाउन पनि सरकारको गम्भीर ध्यानाकर्षण गराएकोछ ।