काठमाडौंका विभिन्न क्षेत्रमा दुई महिनाका लागि निषेधाज्ञा, पाँच जनाभन्दा बढी भेला हुन नपाइने
काठमाडौं,फागुन २६। जिल्ला प्रशासन कार्यालय, काठमाडौंले विभिन्न स्थानमा दुई महिनासम्मका लागि निषेधाज्ञा जारी भएको छ । प्रशासनले आइतबार (फागुन २५) बाट लागू हुने गरी निषेधाज्ञा जारी गरेको हो ।
कार्यपालिका, व्यवस्थापिका र न्यायपालिकाका कार्यालय, अति विशिष्ट व्यक्तिहरुको निवास तथा मुख्य प्रशासनिक केन्द्र र सो आसपासका क्षेत्रमा भेला जम्मा भई अनसन, धर्ना, घेराउ, जुलुस, प्रदर्शन तथा सभा लगायतका विरोधका कार्यक्रमहरू आयोजना गर्दा कामकारबाहीमा बाधा पुग्ने भन्दै प्रशासनले निषेधाज्ञा जारी गरेको हो । पछिल्लो समय राजाबादीहरू प्रदर्शन बढ्न थालेको छ । आइतबार मात्र राजाबादी दल राप्रपा र राप्रपा नेपाल लगायत राजाबादी समर्थकहरूले काठमाडौंमा वृहत प्रदर्शन गरेका थिए ।
प्रशासनले २ (दुई) महिनासम्मका लागि पाँच जनाभन्दा बढि व्यक्ति भेला जम्मा भई अनसन, धर्ना, घेराउ, जुलुस, प्रदर्शन तथा सभा जस्ता विरोधका कार्यक्रम गर्न निषेध गरेको छ।
राष्ट्रपति र उपराष्ट्रपति कार्यालय वरपर, सिंहदरबार, प्रधानमन्त्री निवास बालुवाटार र संसद् भवन वरपरका क्षेत्रमा निषेधाज्ञा जारी भएको जिप्रका काठमाडौंले जनाएको छ ।
