नुवाकोटको तादीमा रहेको दुप्चेश्वर अस्पताल सिल
नुवाकोट,फागुन २१ । तादी गाउँपालिकाको प्रमुख क्षेत्रमा सञ्चालित व्यवसायहरुमा मङ्गलबार बजार अनुगमन गरिएको छ ।
अनुगमन समितिका संयोजक तथा सहायक प्रमुख जिल्ला अधिकारी कृष्णप्रसाद हुमागाईको संयोजकत्वमा दर्ता तथा बजार अनुगमन गरिएको हो ।
अनुगमन टोलीले तादी गापा-४ स्थित दुप्चेश्वर नेपाल हस्पिटल प्रालिले अनुमति तथा इजाजत विना अस्पताल सञ्चालन गरिएको पाईएको छ । उक्त अस्पताललाई २० हजार नगद जरिवानासहित अस्पताल सिल गरिएको अनुगमन समितिका संयोजक हुमागाईले बताए । अनुगमनका क्रममा विना दर्ता सञ्चालन गरिएको अस्पताल सिल गरिएको उनको भनाइ छ । कुनै पनि स्वास्थ्य संस्था सञ्चालन गर्नुअघि सम्बन्धित निकायबाट सञ्चालन अनुमति वा स्वीकृति लिनुपर्ने उनले भने ।
साथै अनुगमनमा बिक्रीका लागि राखिएका बस्तुको म्याद, ब्यवसाय दर्ता, नविकरण, मदिरा कारोबारका लागि ईजाजत लिए, नलिएको र सुर्तीजन्य पदार्थको कारोबार सम्बन्धि नियम कार्यान्वयन गरे नगरेको विषयमा अनुगमन गरिएको थियो ।
अनुगमनमा उद्योग तथा वाणिज्य कार्यालयका प्रमुख किशोर सापकोटा, जनस्वास्थ्य कायालयका प्रतिनिधिलगायतले खरानीटार क्षेत्रलगायतमा सञ्चालनमा रहेको अस्पताल, होटल, मदिरा व्यवसायी, खाद्यान्न किराना, होलसेल पसलहरुमा मदिरा तथा सुर्तीजन्य पदार्थको अन्त:शुल्क अनिवार्य दर्ता तथा नवीकरण गरे नगरेको अनुगमनकोसाथै उक्त सम्बन्धि जानकारी गराएको थियो ।