मकवानपुर बकैयाका विद्यालय र स्वास्थ्यचौकीलाई ल्यापटप र प्रिन्टर प्रदान
मकवानपुर,माघ १२ । मकवानपुरको बकैया गाउँपालिकाका विद्यालय र स्वास्थ्य चौकीलाई ल्यापटप र फोटोकपीसहितको प्रिन्टर मेशिन प्रदान गरिएको छ ।
चालु आर्थिक वर्ष २०८१–८२ को उपकरण सहयोग कार्यक्रमबाट बकैया गाउँपालिका वडा ११ स्थित विद्यालय र स्वास्थ्यचौकीलाई ल्यापटप र फोटोकपीसहतिको प्रिन्टर प्रदान गरिएको हो ।
गाउँपालिका अध्यक्ष धर्मराज लामिछानेलगायतले विद्यालय र स्वास्थ्य चौकीलाई ल्यापटपसहितको उपकरण हस्तान्तरण गरे । बकैया गाउँपालिका ११ गमलटारस्थित प्रगतिशील प्रावि, आहालडाँडास्थित बुद्ध प्रावि, मोरङ्गेस्थित लालकिरण प्रावि., पीपलडाँडा बेंसीस्थित बाघ भैरव प्रावि. र बकैया गाउँपालिका ११ सिमातस्थित स्वास्थ चौकीलाई एक–एक थान गरी पाँच वटा ल्यापटप प्रदान गरिएको बकैया गाउँपालिका –११ का वडाध्यक्ष गोपालबहादुर लामाले जानकारी दिए ।
उनका अनुसार वडाको प्रगतिशील प्राविलाई एक थान फोटोकपीसहितको प्रिन्टर मेसिन हस्तान्तरण गरिएको छ ।