दुर्लभ वन्यजन्तु ध्वाँसे चितुवाको छालासहित रसुवाका दुई जना पक्राउ
काठमाडौ,माघ ६ । दुर्लभ वन्यजन्तु ध्वाँसे चितुवाको छालासहित दुई जना पक्राउ गरेका छन् । प्रहरी प्रभाग नयाँबसपार्क र प्रहरी वृत्त महाराजगञ्जबाट खटिएको संयुक्त प्रहरी टोलीले टेक बहादुर तामाङ र सञ्जय तामाङलाई वन्यजन्तुको छालासहित नियन्त्रणमा लिएको हो ।
गोङ्गबु शिवमन्दिरस्थित भित्री सडक खण्डमा ग १४ प ८४०४ नम्बरको २२० सिसिको रातो कालो पल्सर मोटरसाईकलमा आइरहेका उनीहरुलाई विशेष सूचनाको आधारमा प्रहरीले नियन्त्रणमा लिएको थियो । थप अनुसन्धान तथा कारबाहीको लागि उनीहरुलाई डिभिजन वन कार्यालय, हात्तीसार पठाइएको प्रहरीले जनाएको छ ।
पक्राउ परेकाहरु टेकबहादुर रसुवा उत्तरगया–९ का बासिन्दा हुन भने सञ्जय सोही जिल्लाको कालिका गाउँपालिका–२ का हुन् । प्रहरीले उनीहरुबाट अवैध वन्यजन्तु ध्वाँसे चितुवाको छालाजस्तो देखिने वस्तु १ थान र २२० सिसिको रातो कालो पल्सर मोटरसाईकल थान १ बरामद गरी नियन्त्रणमा लिएको छ ।