कोशीका पूर्वमुख्यमन्त्री उद्धव थापामाथि आक्रमण, २ जना पक्राउ

काठमाडौ,माघ ५ । कोशी प्रदेशका पूर्वमुख्यमन्त्री उद्धव थापामाथि आज साँझ झापामा आक्रमण भएको छ।

नेपाल प्रेस युनियन झापाले आयोजना गरेको कार्यक्रममा सहभागी भएर फर्किने क्रममा नेपाली कांग्रेस कोशी प्रदेश संसदीय दलका नेतासमेत रहेका पूर्वमुख्यमन्त्री थापामाथि  सुरुङ्गामा आक्रमण भएको हो। 

आक्रमणबाट उनको आँखामाथि निधारमा चोट लागेको जिल्ला प्रहरी कार्यालय झापाका प्रवक्ता, प्रहरी नायब उपरीक्षक कृष्णकुमार चन्दले थाहाखबरलाई जानकारी दिए। घटना साँझ ६ बजेतिर भएको हो। घटनाको अनुसन्धान भैरहेको र २ जना पक्राउ गरिएको प्रहरीले जनाएको छ ।