अमेरिका र रोमानिया पठाइदिन्छु भनी ठगी गर्ने दुई महिला पक्राउ
काठमाडौ,माघ ५ । वैदेशिक रोजगारीमा आकर्षक तलबको प्रलोभनमा पारी अमेरिका र रोमानिया पठाइदिन्छु भन्दै रकम ठगी गरेको अभियोगमा दुई जनालाई प्रहरीले पक्राउ गरेको छ ।
पक्राउ पर्नेहरूमा सुनसरी धरान उपमहानगरपालिका–१९ घर भई काठमाडौं महानगरपालिका–२६ बस्ने ५५ वर्षीया चन्द्रकला रदाखु राई र महोत्तरी सोनाम गाउँपालिका–२ घर भई ललितपुर महालक्ष्मी नगरपालिका–५ बस्ने ५४ वर्षीया सरिताकुमारी यादव छन् ।
पक्राउमध्ये चन्द्रकलाले अमेरिका पठाइदिन्छु भन्दै सात पीडितहरूबाट ४२ लाख रूपियाँ र सरिताले रोमानिया पठाइदिन्छु भन्दै एक जना पीडितबाट ६ लाख ३० हजार रूपियाँ लिई सम्पर्कविहीन भएका थिए ।
पैसा लिई सम्पर्कविहीन भएपछि पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले चन्द्रकलालाई काठमाडौं बौद्धबाट बिहीबार र सरितालाई ललितपुर महालक्ष्मी नगरपालिका–५ बाट शुक्रबार पक्राउ गरेको हो ।
चन्द्रकलालाई आवश्यक अनुसन्धान तथा कारवाहीका लागि जिल्ला प्रहरी परिसर काठमाडौं पठाइएको छ भने सरितालाई वैदेशिक रोजगार विभाग ताहाचल काठमाडौं पठाइएको नेपाल प्रहरी प्रधान कार्यालयद्वारा जारी बुलेटिनमा उल्लेख छ ।