मकवानपुरमा सडेको अवस्थामा वृद्धको शव फेला
मकवानपुर,माघ १ । मकवानपुरमा एकजना वृद्धको शव सडेको अवस्थामा फेला परेको छ । मकवानपुरको कैलाश गाउँपालिका –७, भार्ताका ७० वर्षीय टिकाराम प्रजाको भीमफेदी गाउँपालिका –२, रिठेडाँडामा सडेगलेको अवस्थामा शव फेला परेको प्रहरीले जनाएको छ ।
सोमबार ११ बजेर ३० मिनेटको समयमा प्रजाको शव भेटिएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्यामु अर्यालले जानकारी दिए । घटनास्थलमा पुगेर प्रहरीको अनुसन्धान टोलीले अनुसन्धान गरिरहेको प्रवक्ता अर्यालले बताए ।
कात्तिक १४ गते भीमफेदी–९ मा भान्जी पम्फा चेपाङको घर जाने क्रममा प्रजा हराएका थिए । टिकरामका भान्जा रामहरि प्रजाले मङ्सिर ४ गते जिल्ला प्रहरी कार्यालय मकवानपुरमा मामाको खोजी गरिदिन निवेदन दर्ता गराएका थिए ।
मृतकले लगाएको कपडा र साथमा रहेको झोलाको आधारमा सनाखत गरेको जिल्ला प्रहरी कार्यालय मकवानपुरले जनाएको छ । शव पोष्टमार्टमका लागि हेटौँडा अस्पतालमा राखिएको छ ।