सिद्धबाबा सुरुङमार्गको ‘ब्रेक थ्रु’ माघ आठ गते हुने
पाल्पा,पुस २७ । पाल्पाको सिद्धबाबामा निर्माणाधीन सुरुङमार्गको ब्रेक थ्रु माघ आठ गते हुने भएको छ ।
ब्रेक थ्रु सम्बन्धमा आज बिहान प्रधानमन्त्री केपी ओली ,अर्थमन्त्री बिष्णु पौडेल र भौतिक पूर्वाधार मन्त्री देवेन्द्र दाहालसँग पाल्पाबाट प्रतिनिधित्व गर्ने सांसदहरु ठाकुर गैरे र नारायण आचार्य लगायतले छलफल गरेको सांसद गैरेले जानकारी दिए ।
सिद्धार्थ राजमार्गअन्तर्गत बुटवल–पाल्पा सडक खण्डमा पर्ने सिद्धबाबा मन्दिरनजिकै बन्दै गरेको बहुचर्चित सुरुङ ११ महिनामै ब्रेक थ्रु हुने अवस्थामा आइपुगेको हो ।
सुरुङ मार्गका ३ वटा बाइपास यसअघि नै छिचोलिएका छन् । ७ अर्ब ३४ करोड २१ लाख रुपैयाँको लागतमा सुरुङ मार्ग चाइना स्टेट कन्स्ट्रक्सन इन्जिनियरिङ कर्पोरेसनले निर्माण गरिरहेको छ । २७ मार्च २०२७ मा निर्माण सम्पन्न गर्ने गरी कर्पोरेसनलाई जिम्मा दिइएको थियो ।