तेस्रो डीएभी बीसीए इन्टर कलेज फुटसल प्रतियोगिताको तयारी पूरा
काठमाडौं,पुस २५ । तेस्रो डीएभी बीसीए इन्टर कलेज फुटसल प्रतियोगिताको तयारी पूरा भएको छ ।
यही पुस २९ गतेबाट शुरु हुने उक्त प्रतियोगिता डीएभी कलेजसम्बद्ध ह्विजी डेभियन्स क्लबले आयोजना गर्न लागेको हो । प्रतियोगिता डीएभी कलेज परिसरमा हुने आयोजकले जनाएको छ ।
खेलकुदका माध्यमबाट बीसीए कलेजहरूबीच एकता, सहकार्य र भाइचाराको भावना अभिवृद्धि गर्ने उद्देश्यले प्रतियोगिता सञ्चालन गर्न लागिएको कलेजका प्रोग्राम कोर्डिनेटर सुदीप अधिकारीले जानकारी दिए ।
प्रतियोगितामा काठमाडौं उपत्यकाका ३२ ओटा बीसीए कलेजका टीम सहभागी हुनेछन् । प्रतियोगिता आगामी माघ २ गते सम्पन्न हुनेछ । उक्त प्रतियोगिताको विजेता टोलीलाई १ लाख ५० हजार रुपैयाँ नगद पुरस्कारसहित ट्रफी, मेडल र प्रमाणपत्र प्रदान गरिनेछ ।
प्रतियोगिताको उपविजेताले ७५ हजार नगद पुरस्कारसहित ट्रफी, मेडल र प्रमाणपत्र प्रदान गरिनेछ । साथै प्रतियोगितामा उत्कृष्ट खेलाडी, उत्कृष्ट गोलकिपर र सर्वाधिक गोलकर्तालाई ट्रफीद्वारा सम्मान गरिनेछ ।