एमाले केन्द्रिय कमिटीको बैठक विविध प्रस्ताव पारित गर्दै सम्पन्न
काठमाडौ,पुस २३ । नेकपा एमालेको आठौँ केन्द्रिय कमिटी बैठक सुशासन, विकास र समृद्धिको अभिभारा पुरा गर्न राजनीतिक स्थायित्वको प्रतिविद्धतासहित विविध समसामयिक प्रस्तावहरू पारित गर्दै आज सकिएको छ ।
ललितपुरको च्यासलस्थित पार्टी कार्यालयमा आइतबारदेखि बसेको केन्द्रीय कमिटीको बैठकले आज समसामयिक १४ वटा प्रस्ताव पारित गरेको हो ।
बैठकद्वारा पारित प्रस्तावले राष्ट्रिय हितको रक्षा, सामाजिक आर्थिक रूपान्तरण, सुशासन, स्वरोजगार, भ्रष्टाचार नियन्त्रण, पारदर्शिताको सुनिश्चितता, बाढि पहिरो, भूकम्पबाट पीडितको पुर्ननिर्माण, पुनर्स्थापनाका कार्यमा तीव्रता दिन, भूकम्प, मिथ्या सूचना प्रचारलाई रोक्न नियामक निकायका भूमिका थप प्रभावकारी बनाउन सरकारसँग सङ्कल्प र आग्रह गरेको छ ।
केन्द्रिय कमिटी बैठकपछि सञ्चारकर्मीसँगको कुराकानीमा पार्टी प्रचार विभाग प्रमुख राजेन्द्र गौतमले नेकपा एमाले र नेपाली काँग्रेसको संयुक्त सरकार गठन भएसँगै देशमा राजनीतिक स्थायित्वको आशा जागृत भएको बैठकले निष्कर्ष निकालेको बताए ।
बैठकले सत्तारूढ दलहरू बिचको आपसी विश्वास तथा समझदारी अझ सुदृढ बनाउँदै सरकारलाई प्राप्त ऐतिहासिक अवसरलाई सदुपयोग गर्दै विकास र समृद्धिको अभिभारा र गर्न एवं राजनीतिक स्थायित्व सुनिश्चित गर्न सरकारलाई ध्यानाकर्षण समेत गराएको प्रमुख गौतमले जानकारी गराए ।
यस्तै नेकपा एमालेको आजको बैठकमा राजनीतिक प्रतिवेदनमाथिको छलफलपछि बैठकलाई सम्बोधन गर्दै पार्टी अध्यक्ष एवं प्रधानमन्त्री केपी शर्मा ओलीले पार्टी अब पार्टीभित्र कुनै पनि पूर्व समूहहरू कायम नरहेको बताएका छन् ।
प्रधानमन्त्री ओलीले आलोचनाका विषय पार्टीभित्र राख्न सकिने तर लोकतन्त्रका नाममा पार्टीलाई ध्वस्त बनाउने किसिमका गुटबन्दी र अराजकता स्वीकार्य नहुने स्पष्ट पारे ।
प्रधानमन्त्री ओलीले मुलुकलाई स्थायित्व र समृद्धि हासिल गर्ने लक्ष्यसहित समाजवादको गन्तव्यलाई ध्यानमा राखेर वर्तमान सरकारले काम गरिरहेको पनि बताए ।