नागढुङ्गाबाट अवैध लागूऔषधसहित दुई जना पक्राउ
काठमाडौ,पुस १९ । चन्द्रागिरी नगरपालिका–२ नागढुङ्गाबाट अवैध लागूऔषध खैरो हेरोइन जस्तो देखिने पदार्थसहित दुई जनालाई शुक्रबार बिहान प्रहरीले पक्राउ गरेको छ ।
पक्राउ पर्नेहरूमा कपिलवस्तु बाणगङ्गा नगरपालिका–३ बस्ने ३३ वर्षीय वसन्त बस्याल र सप्तरी तिलाठी कोइलाडी गाँउपालिका–२ बस्ने ३४ वर्षीय लालकुमार मण्डल छन् ।
प्रहरी प्रभाग नागढुङ्गा र लागूऔषध नियन्त्रण ब्यूरो शाखा कार्यालय नागढुङ्गाबाट खटिएको प्रहरीले काँकडभिट्टादेखि काठमाडौंतर्फ आउँदै गरेका बा.प्र ०१–००१ ख २८५६ नम्बरको बसमा सवार वसन्तलाई करिब २१ ग्राम र बा.प्र.०१–००६ ख ५६५२ नम्बरको बसमा सवार लालकुमारलाई करिब १५ ग्राम खैरो हेरोइन जस्तो देखिने पदार्थसहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको नेपाल प्रहरी प्रधान कार्यालयद्वारा जारी बुलेटिनमा उल्लेख छ ।