बझाङमा दुई छुट्टाछुट्टै जीप दुर्घटनामा ५ जनाको मृत्यु

बझाङ,पुस १९ । बझाङमा गएराति भएका दुई छुट्टाछुट्टै जीप दुर्घटनामा पाँच जनाको मृत्यु भएको छ ।

जिल्ला प्रहरी कार्यालयका अनुसार गएराति तलकोट गाउँपालिकाबाट चैनपुरतर्फ आउँदै गरेको से १ ज ८४३ नम्बरको जीप सडकबाट करिब दुई सय मिटर तल खसेको थियो । दुर्घटनामा जीप चालक केदारस्यूँ गाउँपालिका-१ रायलका ३३ वर्षीय शम्शेर मल्ल, तलकोट गाउँपालिका-४ का ३६ वर्षीय बमबहादुर धामी, ७२ वर्षीया जोगेनी देवी धामी र ५ वर्षीया आकृति धामीको मृत्यु भएको छ । तीन जनाको घटनास्थलमै र बालिका आकृतिको उपचारका लागि सदरमुकाम लैजाने क्रममा मृत्यु भएको प्रहरी निरीक्षक लोकेन्द्र सिं ठगुन्नाले जानकारी दिए ।

यसैगरी, गएराति नै भएको दुर्घटनामा एक जनाको मृत्यु भएको छ। मष्टा गाउँपालिकाको भातेखोलाबाट रनाडातर्फ जाँदै गरेको सु.प.प्र.०१००१ ज १३९८ नम्बरको जीप कोटदेवलमा दुर्घटना हुँदा चालक ४२ वर्षीय धर्म थापाको घटनास्थलमै मृत्यु भएको प्रहरीले जनाएको छ ।