देउखुरीमा अटो दुर्घटना हुँदा एक जनाको मृत्यु, दुई घाइते
दाङ,पुस १० । दाङको देउखुरीमा अटो दुर्घटना हुँदा एक जनाको मृत्यु भएको छ । दुई जना घाइते भएका छन् । मृत्यु हुनेमा राजपुर गाउँपालिका –३ भैसहवा निवासी ५० बर्षीय तुलाराम बिक रहेको जिल्ला प्रहरी कार्यालय दाङका प्रवक्ता एवं प्रहरी नायव उपरीक्षक ईश्वर थापाले जानकारी दिए । प्रहरी नायव उपरीक्षक थापाका अनुसार दुर्घटनामा गम्भीर घाइते विकको राप्ती स्वास्थ्य विज्ञान प्रतिष्ठान घोराहीमा उपचारका क्रममा मृत्यु भएको हो।
दुर्घटनामा राजपुर गाउँपालिका –२ भैसहवा निवासी ४० बर्षीय बसन्ती विक र राजपुर गाउँपालिका –४ निवासी ३६ बर्षीय प्रेमचन्द्र यादव घाइते भएका छन । विकको लमही अस्पताल देउखुरी र यादवको घोराहीस्थित राप्ती स्वास्थ्य विज्ञान प्रतिष्ठानमा उपचार भइरहेको छ।
गढवा–कोइलावास सडक खण्डअन्तर्गत गढवा गाउँपालिका –५ कक्रहवामा घुम्तिमा मोड्ने क्रममा अनियन्त्रित भएर अटो दुर्घटना भएको हो। बुधवार दिउँसो करिव २ बजेतिर भैसहवादेखि कोइलाबासतर्फ जाँदै गरेको रा १ ह ५९०४ नम्बरको अटो अनियन्त्रित भएर दुर्घटना भएको दाङ प्रहरीले जनाएको छ । यस सम्बन्धी प्रहरीले आवास्यक अनुसन्धान थालिएको जानकारी दिएको छ।