वराहक्षेत्रबाट ९७ केजी गाँजा बरामद
सुनसरी,पुस ८ । सुनसरीको वराहक्षेत्र नगरपालिका क्षेत्रबाट अवैध लागूऔषध बरामद गरिएको छ । सशस्त्र प्रहरीले गस्तीका क्रममा अवैध लागूऔषध गाँजा बरामद गरेको हो । सशस्त्र प्रहरी उपरीक्षक समेनन्द बज्राचार्यले दिएको जानकारी अनुसार सुनसरीको उत्तरी क्षेत्र वराहक्षेत्र नगरपालिका १ को पटनाली खोलाबाट ९७ केजी लागूऔषध गाँजा बरामद गरेको हो ।
सशस्त्रले पटनाली खोलास्थित उत्तरतर्फबाट खोलाको बाटो हुँदै दक्षिण चतरा धरान सडक खण्डतर्फ जाँदै गरेको अपरिचित व्यक्तिहरुले जेबरा झोलामा ल्याउँदै गरेको अवस्थामा उक्त गाँजा बरामद गरेको जनाएको छ ।
९७ केजी प्रतिबन्धित लागूऔषध गाँजा जस्तो देखिने (वनस्पति) सशस्त्र प्रहरी बल नेपाल सुरक्षा बेस चतराबाट खटिएको टोलीले गाँजा फेला पारेकाे थियाे भने गाँजा बाेक्ने व्यक्ति गाँजा फालेर फरार भएको थियो । गाँजा बोक्ने व्यक्ति फरार हुँदा उक्त गाँजा बरामद गरी सुरक्षा बेस चतराले नेपाल प्रहरीलाई बुझाउने प्रक्रियामा रहेको सशस्त्र प्रहरी उपरीक्षक बज्राचार्यले जानकारी दिए ।