दाङ पत्रकार महासंघमा निर्विरोध नेतृत्व
घोराही, मङ्सिर २८ । नेपाल पत्रकार महासंघ दाङको नयाँ नेतृत्व निर्विरोध चयन भएको छ । जिल्लामा क्रियाशील सञ्चार सम्वद्ध संघ संगठनबिच भएको सहमतिअनुसार सबै पदमा एकल उम्मेदवारी दर्ता भएपछि सन्तोष सुवदीसहितको जिल्ला कार्यसमिति निर्विरोध निर्वाचित भएको हो ।
बुधवार उम्मेदवारी दर्तासँगै उम्मेदवारमाथि दावीविरोधका लागि दिएको समयमा कुनै उम्मेदवारप्रति उजुरी नपरेपछि निर्वाचन समितिले निर्विरोध निर्वाचित भएको घोषणा गरेको हो ।
जसअनुसार महासंघ दाङ शाखाको उपाध्यक्षमा ओपेन्द्र बस्नेत र नारायणी रजौरे, सचिवमा जेएन सागर, सहसचिवमा प्रकाश चौधरी, बसन्त परियार र कोषाध्यक्षमा अमरराज भण्डारी निर्विरोध निर्वाचित हुनुभएको मुख्य निर्वाचन अधिकृत सुदीप गौतमले घोषणा गरे ।
मुख्य निर्वाचन अधिकृत गौतमका अनुसार सदस्यमा कृष्णप्रसाद न्यौपाने, नारायणप्रसाद नेपाल, छविलाल पुरी, जंगबहादुर रेउले, रमा नेपाली, सन्तोष खनाल, सरिता चौधरी, सुमन केसी, सुरक्षा चौधरी, टेकबहादुर पुन र हेमराज नेपाली चयन भएका छन् ।
त्यसैगरी राष्ट्रिय परिषद् सदस्यहरुमा सुलोचना गौतम, सुशीलकुमार बस्नेत, शरद अधिकारी र दिप्तीशिखा चौधरी चयन भएका छन् । प्रदेश परिषद् सदस्यमा अमरराज आचार्य, उदय विसी, उमा भण्डारी, कुलदीप न्यौपाने, गिरीराज नेपाली, चन्द्रप्रकाश नेपाली, दशरथ घिमिरे, निमुसँगम घर्ती, यमकला भुसाल र शिवराज पन्थी चयन हुनुभएको मुख्य निर्वाचन अधिकृत गौतमले बताए ।
जिल्लामा निर्विरोध चयन भए पनि प्रदेश र केन्द्रीय समिति निर्वाचित गर्नका लागि मंसिर २८ गते भएको मतदान गणना हुँदैछ ।