नेकपा एमाले शिवपुरीको अध्यक्षमा कमल तामाङ विजयी
नुवाकोट,मंसिर २६ । जिल्लाको शिवपुरी गाउँपालिका नेकपा एमालेको अध्यक्षमा कमल तामाङ उर्फ नुवाकोटे टाइगर विजयी भएका छन् ।
बुधबार भएको पार्टीको निर्वाचनमा टाइगर विजयी भएका हुन् । अध्यक्ष पदका लागि टाइगरसहित पार्टीका रामप्रसाद पुडासैनी, निर्गुणराज थापा प्रतिस्पर्धामा उत्रिएका थिए ।
कुल १६७ मतको मापदण्ड निर्धारण गरिएकोमा १५६ जनाले मतदान गरेका थिए । प्राप्त मतमा विजयी कमल तामाङले ९८ मत हासिल गरेका छन् भने प्रतिस्पर्धी रामप्रसाद पुडासैनीले ३४ मत र निर्गुणराज थापाले २४ मत प्राप्त गरेका छन् ।
यस्तै उपाध्यक्षमा मन्जु लामिछाने निर्वाचित भएकी छिन भने सचिवमा जितसिंह खड्का, उपसचिवमा लक्ष्मण लामा र प्रजिता श्रेष्ठ निर्वाचित भएका छन् ।
राष्ट्रिय खेलाडीका रुपमा परिचित कमल तामाङ शिवपुरी गाउँपालिका वडा नम्बर ६ का निर्वाचित वडा सदस्य समेत हुन् । पछिल्लो समय सामाजिक सेवामा क्रियाशील तामाङ युवा माझ लोकप्रिय छन् ।