सार्कको निरन्तर सक्रियता आह्वान

प्रधानमन्त्री केपी शर्मा ओलीले सार्क राष्ट्रबिच पारस्परिक विश्वास, साझेदारी र सहयोगलाई बढावा दिनु सार्कको प्रमुख भूमिका रहेको बताएका छन् । 

दक्षिण एसियाली क्षेत्रीय सहयोग सङ्गठन (सार्क) ४० औँ बडापत्र दिवसको अवसरमा आइतबार शुभकामना दिदै प्रधानमन्त्री ओलीले शान्तिपूर्ण, समृद्ध र एकीकृत दक्षिण एसियाको निर्माणका लागि सार्क अध्यक्षको हैसियतमा बडापत्रप्रति नेपालको दृढ प्रतिबद्धता व्यक्त गरेका हुन् । 

उनले जलवायु परिवर्तन र अन्तर्राष्ट्रिय सङ्गठित अपराधलगायतका सामाजिक–आर्थिक र वातावरणीय चुनौती निरन्तर रहेको औँल्याउँदै यस क्षेत्रका जनताको साझा हित र समृद्धिका लागि सार्कको निरन्तर सक्रियताको प्रक्रियालाई निरन्तरता दिनका लागि सार्क मुलुकलाई आह्वान गरे । यस दिवसका अवसरमा यस क्षेत्रका जनता र मुलुकहरूको प्रगतिको कामनासहित उनले शुभकामना र बधाई दिएका छन्  । 

त्यस्तै सार्क बडापत्र दिवसको ४० औँ वर्षगाँठको अवसरमा शुभकामना दिदै परराष्ट्रमन्त्री डा. आरजु राणाले संस्थापक नेताहरूको दृष्टिकोण र सामूहिक आत्मनिर्भरता प्रवर्धनमा सार्क बडापत्रको महत्व रहेको औँल्याएका छन् । यस क्षेत्रका नागरिकको गुणस्तरीय जीवन र साझा चुनौतीको सम्बोधन गर्नुका साथै क्षेत्रीय एकतालाई बढावा दिनु आजको आवश्यकता रहेको उनले प्रस्ट पारेका छन्  । सार्क बडापत्रमा उल्लिखित पारस्परिक सहमति, सौहार्दताको भावनामा दिगो विकास उद्देश्यहरू पूरा गर्न सार्कलाई पुनर्जीवित र सक्षम बनाउनुपर्ने आवश्यकता रहेकोमा उनले जोड दिएका छन् ।

पारस्परिक समझदारीमा जोड 

सार्कका महासचिव गोलम सरवरले शुभकामना सन्देश दिँदै क्षेत्रीय सहयोग अभिवृद्धि गर्दै शान्ति, स्वतन्त्रता, सामाजिक न्याय र आर्थिक समृद्धिको उद्देश्यमा अग्रसर हुनुपर्नेमा जोड दिएका छन् । उनले पारस्परिक समझदारी, असल छिमेकी सम्बन्ध र सार्थकता बढाएर उत्कृष्ट उपलब्धि हासिल हुँदै आएको बताएका छन् । 

उनले दक्षिण एसियाली राष्ट्र ऐतिहासिक एवं सांस्कृतिक सम्बन्धका आधारमा सहकार्यमा अग्रसर भइरहेको बताएका छन्  । उनले गरिबी निवारण, आर्थिक समृद्धि, व्यापार, कृषि, शिक्षा, विज्ञान र प्रविधि, ऊर्जा, संस्कृति, क्षेत्रीय जडान, पूर्वाधार विकास, जलवायु परिवर्तन, लगानी, वित्त, सुरक्षा, विपत् जोखिम न्यूनीकरण तथा व्यवस्थापन, आतङ्कवाद र लागुऔषध ओसारपसार नियन्त्रण, नागरिक तहको सम्बन्ध र पर्यटन प्रवर्धनमा अझै प्रभावकारी काम गर्नुपर्नेमा जोड दिएका छन् । 

राष्ट्राध्यक्ष र प्रधानमन्त्रीको सन्देश

बडापत्र दिवसका अवसरमा भारत, पाकिस्तान, बङ्गलादेश, भुटान, श्रीलङ्का र माल्दिभ्सका राष्ट्राध्यक्ष एवं प्रधानमन्त्रीले पनि शुभकामना सन्देशमार्फत सार्क राष्ट्रबिच बलियो सम्बन्ध निर्माण गरी विकास र समुन्नतिमा सहकार्य गर्नुपर्नेमा जोड दिएका छन् ।

भारतका प्रधानमन्त्री नरेन्द्र मोदी, बङ्गलादेशका राष्ट्रपति मोहम्मद साहबुद्दिन र बङ्गलादेश सरकारका प्रमुख सल्लाहकार प्रा. मुहम्मद युनुस, भुटानका प्रधानमन्त्री छिरिङ तोग्बे, माल्दिभ्सका राष्ट्रपति डा. मोहम्मद मुइज्जु र विदेशमन्त्री अब्दुल्ला खलिल, पाकिस्तानका प्रधानमन्त्री सहबाज सरिफ, श्रीलङ्काका राष्ट्रपति अनुरा कुमारा दिसानायके र प्रधानमन्त्री डा. हरिनी अमारासूर्याले शुभकामना सन्देशमार्फत दक्षिण एसियाली राष्ट्रबिचको सम्बन्धलाई विशिष्ट आयाम दिँदै सार्कलाई अझ बलियो बनाउनुपर्ने बताएका छन्  । उनीहरू पारस्पारिक हित, साझेदारी, शान्ति र विकासमार्फत सार्क राष्ट्रको समुन्नति अघि बढाउनुपर्ने बताएका छन् ।