पत्रकार लम्साल सम्मानित
काठमाडौं,मंसिर ३ । डा. यादवप्रसाद पन्त पत्रकारिता पुरस्कारबाट पत्रकार मदन लम्साल सम्मानित भएका छन् ।
डा. यादवप्रसाद पन्त अनुसन्धान तथा विकास प्रतिष्ठानले आइतवार एक विशेष समारोहमा आर्थिक क्षेत्रमा अतुलतीय योगदान गरेको भन्दै लम्साललाई कदरपत्रले सम्मान गरेको हो ।
नेपालको आर्थिक र व्यावसायिक पत्रकारिताको क्षेत्रमा ३ दशकदेखि निरन्तर सक्रिय लम्सालले छापा र अनलाइन मिडियामार्फत आर्थिक जगत्का महत्त्वपूर्ण विषयमा कलम चलाउँदै आएका छन् ।
सम्मान ग्रहण गर्दै लम्सालले आफूले गरिरहेको कामलाई प्रतिष्ठानले मूल्यांकन गरी दिएको सम्मानबाट थप जिम्मेवारी बढेको बताए ।
सोही अवसरमा रमादेवी पन्त सामाजिक सम्मान गृह श्रमिक महिला ढाका उद्यमी समाजका अध्यक्ष प्रेमकुमारी राईलाई प्रदान गरिएको छ । पूर्वअर्थ तथा जलस्रोतमन्त्री डा. यादवप्रसाद पन्तको १००औं जन्मजयन्तीका अवसरमा पूर्वमन्त्री बालाराम घर्तिमगरलाई अभिनन्दनसमेत गरिएको थियो ।
घर्तिमगरले स्व. पन्तलाई स्मरण गर्दै उनी अत्यन्तै मिलनसार र देशप्रेमको भावनाले ओतप्रोत व्यक्ति रहेको बताए । उनले त्यसकारण उनलाई नेपालीले बिर्सन नसकेको घर्तिमगरको भनाइ छ ।
सोही अवसरमा प्रतिष्ठानले प्रकाशन गरेको सम्झनामा डा. यादवप्रसाद पन्त पुस्तकको लोकार्पण लोकसेवा आयोगका अध्यक्ष माधवप्रसाद रेग्मी लगायतले गरे ।