नुवाकोट शिवपुरीकी महिला बेपत्ता घटना थप रहस्यमय
नुवाकोट,कात्तिक ५। जिल्लाको शिवपुरी गाउँपालिका वडा नम्बर ७ सुनखानीबाट महिला बेपत्ता घटना थप रहस्यमय बनेको छ ।
सुनखानीस्थित ठूलो पाटो नजिकै घर भएकी वर्ष २७ की कृष्टिना तामाङ गत असोज १६ गते बुधबार राति १० बजेदेखि बेपत्ता छिन् ।
चतुराले माइती भएकी दुईवटा बच्चाकी आमा समेत रहेकी बेपत्ता कृष्टिनाको खोजी गरिदिन पति पशुपति तामाङले यसअघि सबैलाई आग्रह गरेका थिए ।
तर लामो समय खोजतलासका क्रममा फेला नपरेपछि प्रहरीले आफ्नो अनुसन्धान उनको पति पशुपति तामाङपट्टि सोझ्याएको छ ।
जिल्ला प्रहरी कार्यालय नुवाकोटले बेपत्ता महिलाको श्रीमान पशुपति तामाङलाई पक्राउ गरी अनुसन्धान अगाडि बढाएको जनाएको छ । अनुसन्धानका क्रममा निज तामाङले आफुले हत्या गरी सेफ्टी ट्याङ्कीमा राखेको बताए पनि शव पत्ता लगाउन प्रहरीले सकेको छैन।
एक प्रहरीले साझापथसंग भने- ‘हामीले घटना घटेको आसपासका सेफ्टी ट्याङ्की खोलेर हेरिसक्यौ, तर फेला परेको छैन । सोमबार निजका बुबालाई समेत जिल्ला प्रहरी कार्यालयमा उपस्थित गराई थप अनुसन्धान अगाडि बढाइएको छ ।’ प्रहरीले चाडो भन्दा चाडो निचोडमा पुग्न असहज भएको जनाएको छ । अनुसन्धानमा सबैले सहयोग गरिदिन समेत प्रहरीले अनुरोध गरेको छ।