झोलुङ्गे पुलबाट हाम्फाल्दा एकको मृत्यु
रुकुमपश्चिम,असोज २६ । रुकुमपश्चिमको मुसीकोट नगरपालिका १ मा रहेको झोलुङ्गे पुलबाट हाम्फालेका एक जनाको घटनास्थलमै मृत्यु भएको छ । शनिबार दिउँसो ४ बजे वडा नम्वर १ को मठदेखि सल्ले जोड्ने झोलुङगे पुलबाट हाम फाल्दा एक युवकको मृत्यु भएको प्रहरीले जनाएको छ ।
जिल्ला प्रहरी कार्यालयका प्रहरी निरीक्षक ऋषि पाठकका अनुसार घटनास्थल नजिकै एक रातो ज्याकेट रहेको त्यस ज्याकेटमा मुसीकोट नगरपालिका १ का ३७ वर्षीय बुद्धिराम बोहराको नागरिकता फेला परेको छ । प्रारम्भिक रुपमा मृतक बोहरा नै रहेको अनुमान गरिएको र उनको परिवारका सदस्यहरुलाई घटनास्थलमा बोलाईएको उनले जानकारी दिए ।
घटनास्थलमा रहनुभएका प्रहरी निरीक्षक पाठकले अग्लो पुलबाट हाम्फालेर तल रहेको ढुंगामा परेको कारण शव रक्ताम्य रहेको बताए । आफन्त आएमा शव पहिचान गर्ने र आवश्यक कानूनी प्रक्रिया पुरा गरेर पोष्टमार्टमका लागि जिल्ला अस्पताल सल्लेमा लिने तयारी प्रहरीको रहेको छ ।