दुर्लभ घडियाल गोही कैलालीमा मृत भेटियो

काठमाडौ,असोज २३ । दुर्लभ घडियाल गोही कैलालीमा मृत फेला परेको छ । टीकापुर नगरपालिका–७ बैदीस्थित मोहना नदीमा वयस्क घडियाल गोही मृत अवस्थामा भेटिएको हो । 

मृत्यु भएको घडियाल गोही पोथी रहेको संरक्षणकर्मी भोजराज ढुङ्गानाले जानकारी दिए । उनले घडियाल गोहीको मृत्यु हुनुको कारण यकिन हुन नसके पनि थुतुनोमा माछा मार्ने जाल चेँउढी अड्केको देखिएकाले त्यसले गर्दा मृत्यु भएको हुन सक्ने बताए । “मृत्यु भएको घडियालको चुच्चोमा जाल अड्केको देखिएको छ”, उनले भने,“जाल अड्केपछि सम्भवत: खाना खान नपाएर गोही मरेको हो ।”

विश्व प्रकृति संरक्षण संघ (आइयुसीएन) ले सन २००७ देखि घडियाललाई रातो सूचीमा राखेको छ । अतिसङ्कटापन्न घडियाल कैलालीको मोहना, पथरैया, कर्णाली, कान्द्रा लगायतका नदीमा पाइने गरेका छन् । घडियाल गोहीले यहाँ प्राकृतिक रुपमा बच्चासमेत कोरल्ने गरेका छन् ।