निगमको न्यारोबडीलाई फूलपातीका दिन काठमाडौंबाट भैरहवा उडान भर्न अनुमति
काठमाडौं,असोज २१ । फूलपातीका दिन नेपाल वायुसेवा निगमको न्यारोबडी विमानले काठमाडौंबाट भैरहवा उडान भर्ने भएको छ ।
निगमले आन्तरिक तर्फको उडानमा यात्रुको चाप घटाउने उद्देश्यले उक्त दिन काठमाडौं भैरहवा उडान भर्ने भएको हो ।
गत साता आएको बाढी पहिरोले विभिन्न राजमार्गहरु बन्द भएका छन् । दशैं मनाउन गाउँ फर्किने यात्रुको चाप बढ्दो छ । हवाई यात्रा गर्ने यात्रुको चाप परेपछि निगमको न्यारोबडी विमानले फूलपातीका दिन काठमाडौंबाट भैरहवा उडान गर्ने भएको हो ।
आगामी बिहीबार २४ गते विमान काठमाडौंबाट ११ बजे उड्ने छ । सोही दिन साढे १२ बजे भैरहवाबाट यात्रु ल्याएर काठमाडौं फर्किने तालिका छ । आन्तरिक उडानमा यात्रुका लागि न्यारोबडीले पहिलोपटक उडान अनुमति पाएको हो ।