कास्कीको अन्नपूर्णबाट दुई पर्यटक सम्पर्कविहीन
लेखनाथ,भदौ ११ । कास्कीको अन्नपूर्ण गाउँपालिका वडा नम्बर ९, तिखेढुङ्गाबाट उल्लेरी हुँदै घोरेपानी जाने क्रममा आइतबार दुई स्पेनिस नागरिक सम्पर्कविहीन भएका छन् । उनीहरू म्याग्दीको पर्यटकीय स्थल घोरेपानीसम्म पदयात्रामा जाँदै थिए ।
अन्नपूर्ण गाउँपालिकाका प्रवक्ता भरतमान गुरुङले इरिक कासानोभास र मोलास जुन्का मेसी सम्पर्कविहीन भएको उल्लेख गरे । अन्नपूर्ण वडा नम्बर ९ को भुरुङ्दी खोलाको पुलनजिक बेवारिसे अवस्थामा आइतबार साँझ दुई झोला भेटिएका थिए । सोमबार दिनभर खोजी गरे पनि उहाँहरूको अवस्था पत्ता लाग्न नसकेको र मङ्गलबार गोताखोरसहितको टोलीले खोजी गर्ने गुरुङले बताए ।
अन्नपूर्ण संरक्षण क्षेत्र आयोजना (एक्याप) वीर ठाँटीमा उनीहरूले घोरेपानी जाने सूचना दर्ता गराउनुभएको भेटिएको छ । एक्याप वीरेठाँटी चेकपोस्टका इन्चार्ज यामबहादुर गुरुङले आइतबार बिहान १० बजेर २१ मिनेटमा उनीहरूले कार्यालयमा नाम दर्ता गराउनुभएको थियो । स्पेनिस पुरुष ३७ वर्षीय कासानोभास र महिला ३० वर्षीय मेसी रहेको उनले बताए ।
बाटोमा झोला राखेर छहरामा फोटो खिच्ने क्रममा खोलामा खसेर हुन सक्ने आशङ्काले खोलामा खोजी भइरहेको छ । चेकपोस्ट इन्चार्ज गुरुङले भने, “झोला भेटिएको नजिकै सुन्दर छहरा छ, त्यही फोटो खिच्ने क्रममा लडेर खोलामा परेका हुन सक्छन् । खोज्ने क्रममा छहरामा दुई वटा स्टिक भेटिएका छन् ।”