मुग्लिङ–नारायणगढ सडकको घुमाउनेमा बस दुर्घटना, १५ यात्रु घाइते

काठमाडौं,भदौ ९ । नारायणगढ-मुग्लिन सडकको घुमाउनेमा एक बस दुर्घटनामा परेको छ । सडकको बारले जोगाउँदा बस नदीमा खस्नबाट जोगिएको छ ।

बस आफैं अनियन्त्रित भई दुर्घटना भएको प्रारम्भिक सूचना मिलेको चितवन प्रहरीले जानकारी दिएको छ ।

महेन्द्रनगरबाट काठमाडौँतर्फ जाँदै गरेको सुदूरपश्चिम प्रदेश ०२–००१ ख १३३२ नम्बरको बस दुर्घटना हुँदा उनीहरु घाइते भएका हुन् । घाइतेमध्ये दुई जनाको अवस्था गम्भीर रहेको जिल्ला प्रहरी कार्यालयका प्रहरी नायब उपरीक्षक भेषराज रिजालले जानकारी दिए । घाइते सबैको चितवन मेडिकल कलेजमा उपचार भइरहेको छ ।