गोरखामा राहदानी लिनेको संख्या बढ्यो
गोरखा,साउन २७ । गोरखामा नागरिकता लिनेभन्दा राहादानी बनाउनेको सङ्ख्या बढी रहेको तथ्याङ्कले देखाएको छ । आर्थिक वर्ष २०८०-०८१ मा जिल्ला प्रशासन कार्यालय गोरखा र इलाका प्रशासन कार्याालय सिर्दिबासबाट नागरिकता लिनेभन्दा राहदानी बनाउनेको सङ्ख्या ४ हजार ७० छ ।
आर्थिक वर्ष २०८०-०८१ मा गोरखाबाट ८ हजार ३ सय ५९ जनाले नागरिकता लिएकोमा ३ हजार ९ सय ३६ जना पुरुष छन् भने ४ हजार ४ सय २३ जना महिलाले नागरिकता लिएका छन् । सोही अवधिमा १२ हजार ४ सय २९ जनाले राहदानी लिएकोमा ७ हजार ४ सय ७९ पुरुष छन् भने ४ हजार ९ सय ५० जना महिलाले राहदानी लिएका जिल्ला प्रशासन कार्यालय गोरखाका प्रशासकिय अधिकृत चूडानिधि तिवारीेले जानकारी दिए ।
उनका अनुसार एक वर्षको अवधिमा वैवाहिक अङ्गीकृतको आधारमा ८ जनालाई नागरिकता वितरण गरिएको छ भने ५६ जनालाई गैरआवासीय नागकिरता वितरण तथा आमाको नामबाट १३ जनाको नागरिकता बनाइएको उनले बताए ।
यसैगरी गोरखामा नागरिकता बनाउने प्रत्येक ब्यक्तिले नागरिकतासँगै राहदानी पनि बनाउने गरेकाले पनि राहदानी बनाउनेको सङ्ख्या बढेको जिल्ला प्रशासन कार्यालय गोरखाले जनाएको छ । अत्यधिक मात्रामा वैदेशिक रोजगारी र विदेश पढ्ने रहरले राहदानी बनाउनेको सङ्ख्या बढेको प्रशासकीय अधिकृत तिवारीको भनाइ छ ।
त्यस्तै गोरखामा ८ हजार १ सय ५ जनामा पुरुष ४ हजार ४ सय ३५ र ३ हजार ६ सय ७० जना महिलालाई नागरिकताको प्रतिलिपि वितरण गरिएको जिल्ला प्रशासन कार्यालय गोरखाले जनाएको छ ।