‘दाहाल यज्ञनिधि पुरस्कार–२०८१’ कृतिशेष ज्ञानमणि नेपाललाई
काठमाडौं,साउन २६ । ‘दाहाल यज्ञनिधि पुरस्कार–२०८१’ इतिहासकार कृतिशेष ज्ञानमणि नेपाललाई समर्पण गरिएको छ ।
दाहाल यज्ञनिधि सुधा सदनले शुक्रवार काठमाडौंमा आयोजना गरेको कार्यक्रममा स्वर्गीय नेपालका जेठा छोरा सन्तोषमणि नेपाललाई दोसल्ला र ताम्रपत्रसहित पुरस्कार रकम हस्तान्तरण गरियो । उक्त पुरस्कारको राशि एक लाख ५० हजार रुपैयाँ छ ।
कार्यक्रममा दाहाल यज्ञनिधि बालप्रतिभा पुरस्कार दरबार हाईस्कुलमा अध्ययनरत दुई विद्यार्थीलाई प्रदान गरिएको छ । पुरस्कार पाउनेमा छात्रतर्फ दिनेश कार्की र छात्रातर्फ आस्ना पाण्डे छन् । उनीहरूलाई जनही रु १०–१० हजारसहित सम्मानपत्र प्रदान गरिएको छ ।
सोही कार्यक्रममा ‘दाहाल यज्ञनिधिको जीवनदृष्टि’ कृति लोकार्पणसमेत गरिएको छ । उक्त कृति दाहाल यज्ञनिधि सुधा सदनले प्रकाशन गरेको हो । कार्यक्रममा नेपाल प्रज्ञा प्रतिष्ठानका कुलपति भुपाल राई प्रमुख अतिथि थिए ।