हसिनाले बेलायतमा शरण नपाउने

काठमाडौ,साउन २४ । आरक्षणविरोधी आन्दोलनका कारण भारत पलायन हुनुभएकी बङ्गलादेशका निवर्तमान प्रधानमन्त्री सेख हसिना वाजेदले बेलायतमा शरण नपाउने भएकी छिन । बङ्गलादेशको चर्को आन्दोलन थेग्न नसकेपछि भारत पलायन हुनुभएकी हसिनाले बेलायतमा शरण दिनका लागि अपिल गरेकी थिइन । 

उनको अपिलप्रति बेवास्ता जनाउँदै बेलायत सरकारले शरणका लागि अन्यत्र विकल्प खोज्न सुझाएको छ । बङ्गलादेशमा उत्पन्न हिंसात्मक परिस्थितिको जिम्मेवार कुनै न कुनै रूपमा हसिना भएको लक्षित गर्दै भविष्यमा हुने अनुसन्धानका कारण बेलायतमा अपेक्षित सुरक्षा प्रदान गर्न नसकिने बेलायतको विदेश मन्त्रालयले प्रस्ट पारेको छ । 

विदेश मन्त्रालयका प्रवक्ता डेभिड लाम्मीले सो विषयमा व्यक्त गरेको धारणा अनुसार बेलायत सरकारले बङ्गलादेशमा सिर्जित घटनाबारे स्वतन्त्र र निष्पक्ष छानबिन होस् भन्ने चाहेको द इकोनोमिक्स टाइम्सले उल्लेख गरेको छ । त्यसका लागि बेलायतमा दिइने शरणले निष्पक्ष अनुसन्धानका कारण अपेक्षित सुरक्षा प्रदान गर्न नसक्ने उनले प्रस्ट्याएका छन। विद्यार्थीको उग्र प्रदर्शनपछि सोमबार राजीनामा दिएर हसिना भारत पलायन भएकी थिइन । त्यहाँबाट बेलायतमा शरण लिनका लागि प्रक्रिया सुरु गरेकी थिइन । भविष्यमा हुने अनुसन्धानले बेलायतबाट बङ्गलादेश फिर्ता पठाउनुपर्ने अवस्था सिर्जना गरेमा त्यो झन् अप्ठ्यारो हुने भएकाले अमेरिका, फिनल्यान्ड वा अन्य मुलुकमा शरणका लागि अपिल गर्नुपर्नेमा जोड दिइएको छ । 

बेलायत सरकारले बङ्गलादेशमा घटित घटनाको संयुक्त राष्ट्रसङ्घले स्वतन्त्र अनुसन्धान गर्नुपर्ने धारणा यसअघि नै दिएकाले पनि हसिनालाई त्यहाँ शरण लिन अप्ठ्यारो परेको हो । 

युनुसलाई अन्तरिम सरकारको प्रमुख 

बङ्गलादेशको राजनीतिक नेतृत्वलाई गति दिन अर्थशास्त्री तथा नोबेल पुरस्कार विजेता मोहम्मद युनुस स्वदेश फर्किएका छन् । उनी निवर्तमान प्रधानमन्त्रीको कट्टर विरोधी मानिन्छन । उनीमाथि लागेको श्रम मुद्दा खारेजसँगै स्वदेश फर्केर सङ्क्रमणकालीन सरकारको बागडोर सम्हाल्न तयार भएका हुन् । 

मङ्गलबार त्यहाँको संसद् विघटन गर्दै अन्तरिम राष्ट्रपति साहबुद्दिनले सरकार गठन तयारी थालेका छन् । विद्यार्थी आन्दोलनका नेतृत्वको सिफारिसमा युनुसलाई अन्तरिम सरकारको नेतृत्व दिन राष्ट्रपति, सेनापति तथा अन्य राजनीतिक दलले समर्थन जनाएको छ । फ्रान्सबाट स्वदेश फर्केलगत्तै ८४ वर्षीय समाज सुधारक युनुसले हिंसाको बाटो छाड्दै शान्त रहेर मुलुक निर्माणका लागि तयार रहन सार्वजनिक अपिल गरेका छन् । विगत एक महिनादेखि जारी आन्दोलनमा झन्डै चार सय ५० जनाको मृत्यु भएको थियो । विद्यार्थी नेतृत्वसहितको बैठकमा युनुसलाई अन्तरिम सरकारको नेतृत्व दिएर आगामी निर्वाचित सरकारका लागि ढोका खोल्ने निर्णय भएको जनाइएको छ । गोरखापत्रबाट