वर्षाले सडक बन्द भएपछि सुनसान बने घरबास
![](https://www.sajhapath.com/wp-content/uploads/2024/07/43e8ad1e.jpeg)
ढोरपाटन (बागलुङ),साउन ५ । वर्षाले बाटो बन्द हुँदा बागलुङमा सञ्चालित घरबास (होमस्टे) सुनसान बनेका छन् । असार दोस्रो सातापछिको निरन्तर वर्षाका कारण ग्रामीण सडक अवरुद्ध भएसँगै घरबासमा पाहुनको आगमन नहुँदा सुनसान बनेका हुन् ।
हिउँदको समयमा बढी चहलपहल हुने घरबासमा यति बेला पाहुनाको सङ्ख्या शून्य छ । जिल्लाका ग्रामीण क्षेत्रमा घरबास बढी सञ्चालनमा छन् । अधिकांश घरबासमा पुग्ने सडक बाढी र पहिरोले ठप्प भएका छन् । वर्षाका कारण अवरुद्ध भएका ग्रामीण सडक असोज पछाडि मात्रै खुल्छन् ।
अधिकांश सडक कच्ची भएको हुँदा यात्रा गर्नसमेत असहज हुने हुँदा पाहुना घरबासमा पुग्न चाहँदैनन् । वर्षाले सडक तथा पदमार्ग हिलाम्मे बन्दा घरबाससँगै पर्यटकीयस्थल सुनसान भएको बागलुङ नगरपालिका–१०, भकुण्डेका अतिथि सत्कार होमस्टे सञ्चालक यामबहादुर थापा मगरले बताए ।
‘जिल्ला सदरमुकाम बागलुङ बजार नजिकै रहेको भकुण्डेमा पनि पर्यटक पुग्न सकेका छैनन् । घरबासमा पाहुन आउन छोडेपछि सञ्चालक खेतबारीको काममा व्यस्त छन् । सडक नियमित सञ्चालन नहुँदासम्म गाउँमा पाहुन आउने अवस्था रहँदैन,’ उनले भने ।
जेठ अन्तिम सातासम्म फाट्टफुट्ट पर्यटक पुगे पनि अहिले शून्य भएको मगरले बताए । आन्तरिकसँगै विदेशी पर्यटकसम्म यहाँ आउने गरेका पर्यटक वर्षाले सडक बिगारेपछि अहिले कोही पनि नआएको उनको भनाइ छ ।
हिउँदमा मासिक करीब दुई हजारदेखि तीन हजारसम्मको सङ्ख्यामा पाहुना भकुण्डे पुग्ने गरेका थापाले जानकारी दिए । ‘बर्खामा गाउँसम्म पुग्ने बाटो ठाउँठाउँमा अवरुद्ध हुने गरेको छ । करीब दुई÷तीन महीना यहाँका घरबास र पर्यटकीय क्षेत्र खाली हुन्छन् । पदमार्ग र पूर्वाधारको अवस्थाका कारण असार लागेपछि पाहुनाको सङ्ख्या शून्य भएको हो,’ उनले भने ।
काठेखोला गाउँपालिका–३, धम्जास्थित बेलढुङ्गा सामुदायिक घरबासमा पनि असार लागेपछि पाहुना पुग्न छोडेका छन् । बागलुङ बजारबाट पश्चिममा पर्ने यो घरबासमा हिउँदका बेला मासिक दुई हजारदेखि तीन हजारसम्म पाहुना आउने गरेकामा अहिले सुनसान रहेको बेलढुङ्गा सामुदायिक घरबासकी सचिव माया घर्ती पुनले बताइन् । असोज लागेपछि मात्रै पर्यटकको आगमन बढ्ने उनले उल्लेख गरिन् ।
वर्षाका कारण बेलढुङ्गासम्म पुग्ने सडकको विभिन्न स्थानमा पहिरो जाँदा गाडी सञ्चालन हुन नसकेको घर्तीले बताइन् । पर्यटक आउन छोडेपछि अधिकांश अहिले आलु खन्ने, कोदो रोप्ने र पशुपालनमा व्यस्त छन् ।
‘यो ‘अफसिजन’ भयो, सडकको अवस्था गतिलो छैन, बजारबाट आउँदा पनि धेरै ठाउँमा गाडी अड्किने, ठाउँ–ठाउँमा फस्ने हुँदा यहाँ आउन चाहने पनि बीच बाटोबाटै फर्किनु हुन्छ, राज्यले कम्तीमा गाउँमा आउने सडकस्तरीय बनाइदिए बाह्रै महीना पाहुना भित्र्याउन सक्थ्यौं,’ उनले भनिन्, ‘अब आउने दशैंतिहारको बेला पाहुना आउनुहुन्छ ।’ रासस