अध्यक्ष ओली आइतबार प्रधानमन्त्रीमा नियुक्त हुने
काठमाडौ,असार २९ । राष्ट्रपति रामचन्द्र पौडेलले नेकपा (एमाले) का अध्यक्ष केपी शर्मा ओलीलाई आइतबार प्रधानमन्त्रीमा नियुक्त गर्ने भएका छन् ।
राष्ट्रपतिका प्रेस सल्लाहकार किरण पोखरेलका अनुसार राष्ट्रपतिले निर्धारण गरेको समयपछि आइतबार उनलाई प्रधानमन्त्रीमा नियुक्त गर्न लागेका हुने ।
राष्ट्रपति पौडेलले आइतबार साँझ ५ बजेसम्मका लागि प्रधानमन्त्रीमा दावी पेश गर्ने समय निर्धारण गरेका छन् । उनको आव्हानअनुसार नेपाली काँग्रेस र नेकपा (एमाले) ले अध्यक्ष ओलीलाई प्रधानमन्त्रीमा नियुक्त गर्न आग्रहसहित राष्ट्रपतिसमक्ष शुक्रबार राति नै दावी पेश गरिसकेका छन् ।
“राष्ट्रपति पौडेलले निर्धारण गरेको समयपछि प्रधानमन्त्रीमा ओली आइतबार नियुक्त हुनुहुनेछन । शपथ कार्यक्रम सोमबार मात्र हुनेछ” प्रेस सल्लाहकार पोखरेलले गोरखापत्र अनलाइनलाई जानकारी दिए ।
प्रतिनिधिसभामा पहिलो ठुलो दल काँग्रेसको समर्थनमा एमाले अध्यक्ष ओलीले १६६ सांसदको हस्ताक्षरसहित प्रधानमन्त्रीमा दावी पेश गरेका छन् । संविधानको धारा ७६ (२) अनुसार उहाँले सो पदका लागि दावी पेश गरेका हुन् ।