पहाडी फुड्सका सम्पुर्ण उत्पादन अब भाटभटेनीमा पनि
काठमाडौं,असार १७ । पहाडी फुड्स प्रालिका सम्पूर्ण प्रोडक्टहरु अब देशभरका भाटभटेनी सुपर मार्केटबाट बिक्री हुने भएको छ । पहाडी फुड्सले आफ्ना सम्पूर्ण उत्पादनहरु भाटभटेनीमार्फत बिक्री वितरण गर्नका लागि भाटभटेनी सुपर मार्केटसँग सम्झौता गरेको जनाएको छ। सम्झौता अनुसार कम्पनीले उत्पादन गर्ने सबै सामानहरु भाटभटेनीका देशभरका शाखाबाट पाउन सकिने छ ।
कम्पनीले सबै सामानहरु कृषकबाट खरिद गरी ब्राण्डिङ तथा विक्रीवितरण समेत गर्दै आएको छ । जुम्लाको दाल, पर्वत तथा पोखराको जेठो बुढो चामल, तनहुँको मास, चितवनको महलगायत अचार तेल, विभिन्न ४० वटा कृषि उपजहरु स्वदेशमै विक्रीवितरण गर्दै आएको छ। कम्पनीले यस्ता खाद्यवस्तु्हरु अमेरिका, अस्ट्रेलिया, युके युएई, जापानलगायतका विभिन्न देशमा पनि विक्रीवितरण गरिरहेको छ ।
कम्पनीले किसानको उत्पादनलाई उचित मूल्य दिने र बजार व्यवस्थापन गर्नु आफ्नो मूख्य उद्देश्य भएको बताएको छ । साथै, कम्पनीले ब्राण्डिङ्ग गरेका सामानहरु काठमाडौं उपत्यका भित्रका ५ हजारओटा पसलहरुमा वितरण हुने गरेको छ ।