‘मिस ग्राण्ड नेपाल–२०२४’को आवेदन खुला
काठमाडौं,असार ११ । ‘मिस ग्राण्ड नेपाल, २०२४’ नामक सौन्दर्य प्रतियोगिताको आवेदन खुला गरिएको छ । यहाँ आयोजित पत्रकार सम्मेलनमा आयोजक उमङ्ग क्रिएसन प्रालिका प्रबन्ध निर्देशक उद्धव अधिकारीले यही असार ३१ गतेसम्म आवेदन खुला गरिएको जानकारी दिए ।
उनका अनुसार प्रतियोगितामा १८ देखि २९ वर्ष उमेर समूहका अविवाहित महिलाले आवेदन दिनसक्ने छन् भने आवेदकको उचाइ कम्तीमा पाँच फिट तीन इञ्च हुनुपर्नेछ ।
कम्पनीका अनुसार प्रतियोगिताको विजेताले नेपालको प्रतिनिधित्व गर्दै ‘मिस ग्राण्ड इन्टरनेसनल–२०२४’मा सहभागी हुन पाउनेछन् । ‘यस वर्ष ‘ब्रेभ, बोल्ड, ब्यूटिफूल’ को नारासहित मिस ग्राण्ड नेपाल–२०२४ घोषणा गरिएको छ,’ उनले भने, ‘प्रतियोगिताको ग्राण्ड फिनाले आगामी भदौ ११ गते गरिनेछ ।’