ऐतिहासिक क्षेत्र नुवाकोट घुमेर फर्किने क्रममा भएको कार दुर्घटनामा परेर तीनजनाको मृत्यु

पाल्पा,जेठ ३१ । ऐतिहासिक क्षेत्र नुवाकोट घुमेर फर्किने क्रममा भएको कार दुर्घटनामा परेर तीनजनाको मृत्यु भएको छ । पाल्पाको तिनाउ गाउँपालिका वडा नम्बर २ स्थित नुवाकोटबाट बुटवलतर्फ आउँदै गरेको कार दुर्घटनामा तीन जनाको मृत्यु भएको हो । दुर्घटनामा दुई जना घाइते भएका छन्।

कार दुर्घटना बुधबार साँझ करिब साढे ८ बजेतिर भएको थियो । इलाका प्रहरी कार्यालय बुटवलका अनुसार नुवाकोटबाट बुटवल झर्दै गरेको लु २ च ८५३१ नम्बरको कार भ्यू पोइन्ट नजिकै सडकबाट झन्डै १ सय मिटर तल खसेको थियो।

दुर्घटनामा परी बुटवल वडा नम्बर १० का ५५ वर्षीय रामप्रसाद शर्मा, तिलोत्तमा  वडा नम्बर ३ की ६७ वर्षीया आशा श्रेष्ठ र ५० वर्षीया भगवती श्रेष्ठ रहेका छन्। 

दुर्घटनामा गम्भीर घाइते भएका उनीहरूको उपचारका क्रममा बुधबार राति नै मृत्यु भएको प्रहरीले जनाएको छ। घाइतेको लुम्बिनी प्रादेशिक अस्पतालमा उपचार भैरहेको बुझिएको छ।