अत्याधिक गर्मीले नुवाकोटमा विद्यार्थी बेहोस हुन थाले

नुवाकोट,जेठ ३१ । अत्याधिक गर्मीका कारण नुवाकोटमा बिद्यार्थी बेहोस हुन थालेका छन् ।

बुधबार विदुर नगरपालिका वडा नम्बर ५ मा रहेको शहीद जगत प्रकाशजंग शाह संस्कृत माध्यामिक विद्यालयका पाँच विद्यार्थी गर्मिका कारण बेहोस भएका हुन् ।

गर्मी धेरै भएका कारण दिउँसो विद्यालयमा पढी रहेका बेला ३ जना छात्रा र २ जना छात्रसहित ५ जना वेहोस भएका विद्यालयले जनाएको छ ।

विद्यालयका प्रधानाध्यापक मञ्जु चित्रकारका अनुसार गर्मिका कारण विद्यार्थीहरु बेहोस भएका हुन् । उनीहरु झण्डै एक घण्टा बेहास भएको बताइएको छ । गर्मीले बेहोस भएका विद्यार्थीहरूलाई चिसो पानी प्युन दिएपछि विस्तारै होसमा आएका थिए ।

पछिल्लो समय नुवाकोटमा ३८ डिग्री तापक्रम समेत मापन गरिएको छ । पहाडी भूभाग भएपनि निरन्तर तापक्रम वृद्धिले  नागरिकको दैनिकीमा सकस हुन थालेको छ ।