निगरानीपछि बढ्यो पशुपतिको भेटी

काठमाडौं,जेठ २७ । पशुपतिनाथ मन्दिरमा दर्शनार्थीले चढाएको भेटी चोरीमा संलग्न रहेको अभियोगमा पाँच अभियुक्त पक्राउ परेपछि दुई महिनायताकै सर्वाधिक भेटी सङ्कलन भएको छ । 

पशुपति क्षेत्र विकास कोषका कोषाध्यक्ष नारायणप्रसाद सुवेदीको संरक्षणमा भेटी चोरीमा संलग्न कोषका नायब सुब्बासहितका कर्मचारी पक्राउ परेपछि कोषमा जम्मा हुने भेटी बढेको हो । 

कोषका सदस्य सचिव डा. मिलनकुमार थापाका अनुसार भेटी चोरीको गिरोहलाई प्रहरीमा बुझाएपछि र सिसिटिभीमार्फत निगरानी बढाउँदा यस वर्षको सर्वाधिकसहित जेठ १ देखि २२ गतेसम्ममै एक करोड पाँच लाख नौ हजार १६७ रुपियाँ भेटी सङ्कलन भएको छ । 

यसअघि वैशाख १ देखि ३१ गतेसम्ममा एक करोड १२ लाख पाँच हजार ७३२ रुपियाँ सङ्कलन भएको छ । उहाँले जेठ २० गते दुई महिनायताकै सर्वाधिक सात लाख सात हजार ३१६ रुपियाँ भेटी सङ्कलन भएको बताए । उनले सङ्कलित भेटी मन्दिर परिसरबाटै मुचुल्का गरेर नेपाल इन्भेस्टमेन्ट मेघा बैङ्कमा जम्मा गरिने बताए । 

डा. थापाले भने, “भगवान् पशुपतिनाथ मन्दिरमा दर्शनार्थीले आस्थाले चढाएको भेटी चोरी गर्ने गिरोह नै पहिल्यैदेखि सक्रिय रहेछ । भेटी चोरी हुने गुनासो आएपछि हामीले उच्च प्राथमिकताका साथ निगरानी गर्यौ। सिसिटिभी निगरानी गरेर रङ्गेहात नियन्त्रणमा लिई प्रहरीमा बुझाएपछि अनुपातिक रूपमा भेटी सङ्कलनमा वृद्धि भएको छ ।”

जेठ ८ गते कोषका नायब सुब्बा नवराज ढोडारी, मन्दिरका ब्राह्मण नवराज घिमिरे, मन्दिरमा बाजा बजाउने कर्मचारीत्रय अनिल परियार, सञ्जय कपाली र कुमार परियारलाई महानगरीय प्रहरी वृत्त गौशालाले काठमाडौँ जिल्ला अदालतबाट अनुसन्धानका लागि म्याद थप गरी अनुसन्धान गरिरहेको छ । 

मुख्य आरोपीमाथि भएन छानबिन

गौशाला प्रहरीका प्रमुख प्रहरी नायब उपरीक्षक केशवराज थेबेले नियन्त्रणमा लिइएका पाँचै जनामाथि अनुसन्धान भइरहेको बताए । नासु ढोडारीको घरबाटै छ लाख रुपियाँ बरामद भएपछि प्रहरीले अझै सूक्ष्म ढङ्गले अनुसन्धान अघि बढाएको छ । तर भेटी चोरी गर्ने कार्यका लागि कर्मचारी नै खटाउने भनी पोलिएका कोषका कोषाध्यक्ष नारायणप्रसाद सुवेदीसँग प्रहरीले बयान लिएको छैन । 

संस्कृति संरक्षण महाशाखाका नासु ढोडारी, ब्राह्मण घिमिरेसहित बाजा बजाउने कर्मचारीमाथि मात्रै अनुसन्धान भइरहेको छ । डिएसपी थेबेले भने, “आवश्यक परे जसलाई पनि बोलाउँछौँ ।”