स्कुल बसले किचेर विद्यार्थीको मृत्यु, राजमार्ग अवरुद्ध
सर्लाही,मंसिर ५ । नवलपुर–मलङ्गवा सडक खण्डअन्तर्गत सर्लाहीको हरिपुर नगरपालिका –८, जुटपानीमा मङ्गलबार अपरान्ह स्कुल बसले किच्दा एक विद्यार्थीको मृत्यु भएको छ ।
लालबन्दी–१ नवलपुरमा रहेको जेआइसी बोर्डिङ स्कुलको बसले किचेर सोही विद्यालयको एलकेजीमा अध्ययनरत हरिपुर नगरपालिका –८ घर भई लालबन्दी नगरपालिका–२ मा बस्ने वीरेन्द्र पासवानका ६ वर्षीय आदित्य पासवानको मृत्यु भएको हो ।
जुटपानीस्थित हरिपुर र लालबन्दी नगरपालिकाको सीमामा भएको दुर्घटनामा गम्भीर घाइते भएका बालक आदित्यलाई उपचारका लागि स्वाभिमान अस्पताल बर्दिबास लैजाँदा चिकित्सकले मृत घोषणा गरेको इलाका प्रहरी कार्यालय हरिपुरले जनाएको छ ।
दुर्घटनामा संलग्न स्कुल बस र बस चालकलाई इलाका प्रहरी कार्यालय लालबन्दीको नियन्त्रणमा लिएको छ ।