काठमाडौं महानगरपालिकाको करदातालाई आयो कर छुट सुविधा

काठमाडौं,साउन ११ । चालु आर्थिक बर्षका लागि काठमाडौं महानगरपालिकाले करदातालाई कर छुट सुविधा उपलब्ध गराएको छ । आर्थिक ऐन २०८० मा यस सम्बन्धी व्यवस्था गरिएको छ ।

सम्पत्ति कर, बहाल कर, व्यवसाय करमा अवधि तोकेर छुट सुविधा उपलब्ध गराइएको छ । छुट सुविधा वडा कार्यालयबाट लिन सकिने राजस्व विभागका प्रमुख ध्रुवकुमार काफ्लेले जानकारी दिए ।

सालबसाली नियमित कर दाखिला गर्ने सम्पत्ति कर र व्यवसाय बहाल कर दातालाई २०८० पुस मसान्तसम्म रकममा १०५ छुट हुनेछ । महानगर क्षेत्रभित्र सञ्चालित होटल, रिसोर्ट वा चलचित्र घरको नाममा घरजग्गा भई वा लिजमा लिएर होटल, रिसोर्ट वा चलचित्र घर निर्माण गरी सञ्चालन गरेका कर दातालाई बक्यौता सहितको सम्पत्ति करमा ३० प्रतिशत छुट दिइएको छ । यो सुविधा पुस मसान्तसम्म मात्र हुनेछ ।

व्यावसायिक रूपमा सवारी साधन पार्किड प्रयोजनका लागि भवन निर्माण गर्ने कर दातालाई भवन निर्माण सम्पन्न भएको मितिले पार्किङ प्रयोजनका लागि प्रयोग हुने क्षेत्रको १० वर्षसम्म सम्पत्ति कर छुट हुनेछ । एक वडा एक नमूना उद्यम कार्यक्रम अन्तर्गत सञ्चालित उद्योग वा व्यवसायहरूको दर्ता भएको ३ वर्षसम्म निजले तिर्न बुझाउनु पर्ने व्यवसाय कर र शुल्कको १५ प्रतिशत छूट हुनेछ । चालु आर्थिक वर्षसम्म करको दायरामा नआएका जुनसुकै उमेरका महिला, जनजाति, दलित, अपाङ्गता भएका र ३५ वर्षभन्दा कम उमेरका युवाका नाममा दर्ता भई सञ्चालनमा रहेका ५ लाखसम्म पुँजीगत लगानी भएका उद्योग व्यवसाय, कम्पनी, संस्थाले २०८० पौष मसान्तभित्र कर दाखिला गरेमा जम्मा कर रकमको ४० प्रतिशत र नियमित कर दाखिला गर्ने कर दाताका हकमा कर रकमको २५ प्रतिशत छुट हुनेछ ।

यो छुट काठमाडौं महानगरपालिकामा स्थायी बसोबास भएका व्यक्तिलाई नागरिकता, मतदाता परिचय पत्र वा बसाई सराइ प्रमाण पत्रका आधारमा दिइनेछ ।