कृषिजन्य वस्तुको आयातनिर्यात घट्यो
काठमाडौं,फागुन १४ । नेपालमा मुख्य कृषिजन्य वस्तुको आयातनिर्यात दुवै घटेको छ । कृषि तथा पशुपन्छी विकास मन्त्रालयका अनुसार चालू आर्थिक वर्ष (आव) को पहिलो ६ महीनामा कृषिजन्य वस्तुको आयात ४३ प्रतिशतले घटेको छ । भारतले कृषि उपजको निर्यातमा कडाइ गरेको र केही वस्तुको आन्तरिक उत्पादन बढेकाले आयात घटेको हो ।
कृषि तथा पशुपन्छी विकास मन्त्रालयका प्रवक्ता प्रकाशकुमार सञ्जेलले कृषि वस्तुको आयात र निर्यात दुवै घटेको जानकारी दिए । ठूलो मात्रामा आयात घट्नुको कारणबारे मन्त्रालयले छुट्टै अध्ययन गरिसकेको नभए पनि भारतले कृषि उपजको निर्यातमा गरेको कडाइका कारण र केही वस्तुको आन्तरिक उत्पादन विगतको तुलनामा बढेको हुनाले आयात घटेको उनले दाबी गरे । केही हदसम्म मूल्य पनि घटेकाले यस्तो अवस्था देखिएको उनले बताए ।
मन्त्रालयले उपलब्ध गराएको तथ्यांकअनुसार धान/चामल र मकैको आयात घटेको छ । गहुँको आयात सबैभन्दा धेरै घटेको छ । सञ्जेलका अनुसार भारतले गहुँ निर्यातमा रोक लगाउनाले त्यसको प्रत्यक्ष असर नेपालको आयातमा परेको हो । रूस–युक्रेन तनावका कारण भारतले आफ्नै मुलुकमा गहुँ अभाव हुने अनुमान गरेर यसको निर्यातमा प्रतिबन्ध लगाएको छ ।
त्यसैगरी केरा र आलुको आयात पनि घटेको छ । अन्य कृषि उपजको आयात घटिरहँदा प्याज आयात भने बढेको छ । गएको साउनदेखि पुससम्ममा ताजा फलफूलमध्ये स्याउ आयात घटेको छ । सुन्तला जातका फलफूल आयात बढेको देखिन्छ । सूर्यमुखी, भटमास र पाम तेलको आयात पनि घटेको तथ्यांकले देखाएको छ ।
निर्याततर्फ कफी, घिउ, सूर्यमुखी तेल, भटमास तेलको निकासी घटेको छ । अदुवा, ताजा तरकारी र अलैंची निर्यात भने केही मात्रामा बढेको तथ्यांकले देखाएको छ ।