नुवाकोटका पत्रकार विनय बन्जराले पाए सेजन ब्रोडकाष्ट मिडिया अवार्ड
काठमाडौं,फागुन १ । यसवर्षको सेजन ब्रोडकाष्ट मिडिया अवार्ड आर्थिक पत्रकार विनय बन्जराले प्राप्त गरेका छन् । बन्जरा नुवाकोट शिवपुरी गाउँपालिका वडा नम्बर ५ स्थायी निवासी युवा पत्रकार हुन् ।
नेपाल आर्थिक पत्रकार समाज (सेजन) ले हरेक वर्ष प्रदान गर्ने सेजन अवार्डमा यसवर्षको ब्रोडकाष्ट मिडिया अवार्ड ग्यालेक्सी फोर के टेलिभिजनका विजनेस ब्यूरो प्रमुख बन्जराले पाएका हुन् ।
आइतवार राजधानीमा एक कार्यक्रमको आयोजना गरि विभिन्न विद्यामा सेजन अवार्ड प्रदान गरिएको थियो । अर्थतन्त्रका सवालमा पत्रकारिताका माध्यमबाट उल्लेख्य योगदान पु¥याएको भन्दै सेजनले अवार्ड प्रदान गर्दै आएको छ।
यसवर्षको सेजन अवार्ड अन्नपूर्ण दैनिकका पत्रकारद्वय ममता थापा र सुरेन्द्र काफ्लेले पाएका छन् । यसवर्षको डा. भोला चालिसे लिबरल जनर्नालिज्म अवार्ड कान्तिपुर दैनिकका अर्थ ब्युरो प्रमुख कृष्ण आचार्यले प्राप्त गरेका छन् ।
यसवर्षको सेजन प्रीन्ट मिडिया अवार्ड टक्सार म्यागजिनका प्रधान सम्पादक गजेन्द्र बुढाथोकी र सेजन डिजिटल मिडिया अवार्ड पहिचान मिडियाका ठाकुरप्रसाद दुलाल (माधव) ले प्राप्त गरेका छन् । यसवर्षको सञ्जय न्यौपाने आर्थिक पत्रकारिता फेलोसिप कारोबार दैनिकका कौसिला कुवँरलाई दिइएको छ ।