नेपालमा आयात हुने स्याउको परिमाण र मूल्य दुबै घट्यो, बजारमा भने सस्तिएन
काठमाडौं,माघ १४ । नेपालले चालू आर्थिक वर्ष (आव) को पहिलो ६ महीनामा ३ अर्ब ४९ करोड रुपैयाँ बराबरको स्याउ आयात गरेको छ । विदेशबाट साढे ३ अर्बको स्याउ आयात गर्दा सरकारले ४० करोड ५ लाख ७९ हजार रुपैयाँ राजस्व संकलन पाएको छ ।
नेपालले ६ महीनामा आयात गरेको स्याउको परिमाण ४ करोड ६२ लाख ९७ हजार ५२ किलो छ । यो भनेको औसत ७५ रुपैयाँ किलोका दरले स्याउ आयात भएको देखिन्छ ।
गत वर्षको सोही अवधिमा भने नेपालले ३ अर्ब ८२ करोड रुपैयाँ बराबरको ४ करोड ८९ लाख ९९ हजार ९८९ किलो स्याउ आयात गरेको थियो । यतिबेला नेपालले औसत ७८ रुपैयाँ किलोका दरले स्याउ आयात गरेको थियो ।
गत वर्षको तुलनामा यो वर्ष स्याउको आयात सँगै मूल्य पनि घटेको छ । गत वर्षको सोही अवधिको तुलामा यो वर्ष स्याउको आयात ८ प्रतिशतले घटेको छ भने मूल्य प्रतिकिलो ३ रुपैयाँका दरले घटेको छ । तर बजारमा भने उपभोक्ताले मूल्य झनै बढेको अनुभव गरेका छन् ।
कुलेश्वर फलफूल बजारका व्यवसायी अमर बानियाँले विगतका वर्षहरूको तुलनामा यो वर्ष आन्तरिक उत्पादन बढेकाले स्याउ आयात घटेको बताए ।
उनले भने, ‘पहिला पहिला सिजनमा पनि भारत र चीन कै स्याउ ले बजार भरिन्थ्यो तर अहिले नेपाली उतपादन पनि छ ।’ उनको अनुभवमा अहिले स्याउको मात्र नभएर अन्य फलफूलको पनि आयात घटेको छ ।
नेपालले भारत,चीन र अमेरिकाबाट स्याउ आयात गर्ने गरेको छ । यो अवधिमा सबै भन्दा धेरै स्याउ भारत बाट १ अर्ब ९२ करोड रुपैयाँ बराबरको २ करोड ९२ लाख ५३ हजार ६३८ किलो स्याउ आयात गरेको छ । त्यस्तै चीन बाट १ अर्ब ५७ करोड रुपैयाँ बराबरको १ करोड ७० लाख २२ हजार ८३४ किलो स्याउ आयात गरेको छ ।
त्यसैगरी अमेरिका बाट ५० लाख ३४ हजार रुपैयाँको २० हजार ५८० किलो स्याउ आयात गरेको भन्सार विभागको तथ्यांक छ ।