नुवाकोट शिवपुरीमा माध्यमिक स्तरीय हाजिरी जवाफ प्रतियोगिता सम्पन्न
तस्वीर सौजन्य: प्रवीण थपलिया
नुवाकोट,पुस १ । जिल्लाको शिवपुरी गाउँपालिकामा माध्यमिक स्तरीय हाजिरी जवाफ प्रतियोगिता सम्पन्न भएको छ । शिवपुरी गाउँपालिकाको शिक्षा युवा तथा खेलकुद शाखाको आयोजनामा प्रतियोगिता सम्पन्न भएको हो ।
शुक्रबार शिवपुरी गाउँपालिका वडा नम्बर ५ मा रहेको जानकी माध्यमिक विद्यालयमा भएको प्रतियोगितामा सेवा क्षेत्रको विभिन्न ९ वटा विद्यालयको सहभागिता रहेको थियोे ।
प्रतियोगितामा स्याउरेभुमी माध्यमिक विद्यालयका २८ अङ्कका साथ प्रथम स्थान हासिल गर्दै प्रमाणपत्रसहित ९ हजार जित्न सफल भएको छ । त्यस्तै जनज्ञान निकेतन माध्यमिक विद्यालयले २० अङ्क हासिल गर्दै नगद ६ हजारसहित प्रमाणपत्र प्राप्त गरेको छ ।
प्रतियोगितामा जानकी माध्यमिक विद्यालयका छात्रछात्राले १७ अङ्कका साथ तृतीय स्थान हासिल गरी ३ हजार नगद तथा प्रमाणपत्र जित्न सफल भएको छ । त्यस्तै सान्त्वना पुरस्कार कालीका माध्यमिक विद्यालयका विद्यार्थीले १६ अङ्कका साथ १५ सय नगदसहित प्रमाणपत्र जित्न सफल भएका छन् ।
शिवपुरी गाउँपालिकाका उपाध्यक्ष वीरवहादुर तामाङको प्रमुख आतिथ्यमा भएको कार्यक्रममा शिक्षा युवा तथा खेलकुद शाखा प्रमुख रामप्रसाद अधिकारी र अनुप भट्ट, शिवपुरी ५ का वडाअध्यक्ष रेसम बहादुर तामाङ, विभिन्न विद्यालयका शिक्षक तथा प्रधानाध्यापक, विद्यार्थी लगायतको उपस्थिति रहेको थियोे।