राजनीतिक दलले टुंगो लगाए समानुपातिकतर्फका सदस्यको नामावली [सूचीसहित]

काठमाडौं,मंसिर २५ । तीन ओटा अलग – अलग ठूला राजनीतिक दलहरुले समानुपातिक पद्धतिबाट चयन हुने प्रतिनिधिसभा सदस्यको नाम टुंगो लगाएका छन् । शनिवार साँझसम्ममा नेपाली कांग्रेस, नेकपा(एमाले), नेकपा माओवादी केन्द्र लगायतका दलहरुले समानुपातिकतर्फका प्रतिनिधिसभाका सदस्यको नाम टुंगो लगाएका हुन् ।

नेपाली काँग्रेसले प्रतिनिधिसभाको समानुपातिकतर्फ ३२ जनाको नाम निर्वाचन आयोगसमक्ष सिफारिस गरेको छ । सो पार्टीको बैठकले प्रतिनिधिसभातर्फ विभिन्न क्लस्टरबाट ३२ जनाको नाम टुंग्याएको हो ।

आदिवासी जनजातितर्फ सरस्वती बजिमय, लिलादेवी बोखिम, सिताकुमारी राना, सुशीला थिङ, सपना राजभण्डारी, माया राई,  कुसुम थापामगर, मनोरमा सेरचन चयन भएका छन् ।

त्यसैगरी खस आर्यतर्फ अम्बिका बस्नेत, सरिता प्रसाईं, आरजु राणा देउवा, ईश्वरी न्यौपाने, प्रतिमा गौतम, मञ्जु खाँण, रमा कोइराला पौडेल, कान्तिका सेजुवाल, मैना रावल कार्की चयन भएका छन् ।  उता मधेसीतर्फ नागिना यादव, मुक्ताकुमारी यादव, चन्दा चौधरी, संगीता मण्डल, निनुकुमारी कर्ण चयन भएका छन् ।

त्यस्तै दलिततर्फ शान्ति विक, रुपा विक, सीता मिजार, आशा विक छन् भने थारुतर्फ कल्पना चौधरी, विनाकुमारी थनेत चयन भएका छन् । मुस्लिमतर्फबाट जावेदा खातुन् जागा र पुरुषमा जीवन परियार,विमलेन्द्र निधि,  प्रकाशशरण महत चयन भएका छन् । प्रत्यक्षतर्फ भने सो पार्टीका ५७ जना सांसद निर्वाचित भएका थिए ।

यसैगरी नेकपा (एमाले) ले पनि समानुपातिकतर्फ सांसदको रुपमा १२ जना पुरुष र २२ जना महिलाको नाम सिफारिस गरेको छ । एमालेले खास आर्य महिलातर्फ मेनकाकुमारी पोखरेल, सरिता भूसाल, शोभा ज्ञवाली, बिजुला रायमाझी, निर्मला कोइराला, सम्झना थपलिया, दीपा शर्मा र सुनिता बरालको नाम निर्वाचन आयोगमा सिफारिस गरेको छ ।

आदिवासी जनजाति महिलातर्फ सात जना महिला छनोट भएका छन् । नैनकला थापा, सूर्यकुमारी श्रेष्ठ, उर्मिला थेबे, ईश्वरी घर्ती, रणकुमार बलम्पाकी, शान्ति श्रेष्ठ र सरस्वती सुब्बा छन् ।

त्यसैगरी पुरुषतर्फ रघुजी पन्त, एकनाथ ढकाल र दयालबहादुर शाही रहेका छन् । देवीप्रसाद भट्टचन, हेमराज राई र कालुराम राई छन् । दलित पुरुषतर्फ ईश्वरबहादुर रिजाल विक, प्रभु हजारा दुसाध र चन्द्र विक रहेका छन् ।

महिलातर्फ रुक्मिणी राना बराइली र हर्कमाया विश्वकर्मा रहेका छन् । त्यसैगरी मधेशीतर्फ गंगाप्रसाद यादव र अमृतलाल राजवंशी, महिलातर्फ विना देवी, अमृता अग्रहरी र प्रतिक्षा तिवारी रहेका छन् ।

मुस्लिमतर्फ सराज अहमद फारुकी रहेका छन् । समानुपातिकतर्फ सो पार्टीले ३४ स्थान प्राप्त गरेको छ । सो पार्टीबाट प्रतिनिधिसभाको प्रत्यक्षतर्फ ४४ जना निर्वाचित भएका थिए ।

माओवादीले पनि पठायो १४ समानुपातिक सांसदको सूची

नेकपा माओवादी केन्द्रले प्रतिनिधिसभाको समानुपातिकतर्फ १४ जना सांसद सिफारिस गरेको छ । माओवादीले विभिन्न क्लस्टरबाट १४ जनाको नाम निर्वाचन आयोगमा पठाएको हो । जसअनुसार खसआर्य पुरुषमा हितराज पाण्डे, महिलातर्फ विमला सुवेदी, ज्ञानु बस्नेत सुवेदी र नारायणी शर्मा सिफारिस भएका छन् ।

यस्तै आदिवासी जनाजति महिलामा दुर्गा राई, मिना तामाङ, उर्मिला माझी पौडेल र छिरिङ ल्यामु लामा तामाङको नाम आयोगमा पठाइएको छ ।

मधेसी महिला मिना यादव र उमरावती देवी यादव, दलित पुरुषमा रणेन्द्र बराली, महिलातर्फ सुशीला श्रीपाली ठकुरी छन् भने थारु महिलातर्फ रुपा सोसी चौधरीको नाम आयोगमा पठाइएको छ । मुस्लिम महिलातर्फ कल्पना मियाँ छिन् ।

उता राष्ट्रिय स्वतन्त्र पार्टीले पनि समानुपातिक पद्धतिबाट पाएका १३ जनाको नामावली टुंगो लगाएको छ । दलितबाट सन्तोष परियार र शिव नेपाली, आदिवासी जनजातिबाट डा. ढाकाकुमार श्रेष्ठ, इन्दिरा राना मगर र सुमना श्रेष्ठ, खस आर्यबाट डा. चन्दा कार्की, डोलप्रसाद अर्याल । निशा डाँगी, विनिता कठायत चयन भएका छन् ।त्यस्तै मधेसीबाट लक्ष्मी तिवारी र मनिष झा, थारुबाट अशोक चौधरी र मुस्लिमबाट असिम साह छनोट भएका छन्।

समानुपातिकतर्फका सांसद निर्वाचित भएको घोषणा  मंसिर २६ गते : निर्वाचन आयोग
निर्वाचन आयोगले मंसिर २६ गतेसम्ममा समानुपातिकतर्फका सांसदहरु पनि निर्वाचित भएको घोषणा गर्ने भएको छ ।

निर्वाचन आयोगका अनुसार राजनीतिक दलहरुले शनिवार बुझाएको नामावली जाँचबुझ गरी सोमवार समानुपातिकतर्फका सांसदहरु पनि निर्वाचित भएको घोषणा हुने छन् । आयोगले समानुपातिकतर्फबाट सांसदहरु पनि निर्वाचित भएको एक हप्ताभित्र निर्वाचन सम्बन्धि सम्पूर्ण प्रतिवेदन राष्ट्रपति विद्या भण्डारी समक्ष बुझाउने बताएको छ।