बाजुरा बुढीगंगामा मेयर–उपमेयर सहित ७ वडा एमालेको पोल्टोमा
काठमाडौं,असार २६ । बाजुराको बुढीगंगा नगरपालिकामा मेयर र उपमेयरमा एमाले विजयी भएको छ । मेयरमा रामबहादुर बानियाँ र उपमेयरमा मायाकुमारी खड्का (कुँवर) विजयी भएका हुन ।
एमालेका बानियाँले ४ हजार ७७७ मत ल्याएर निर्वाचित हुँदा उनका निकटतम प्रतिद्वन्द्वी काँग्रेसका रंगबहादुर खातीले तीन हजार ७७४ मत पाएर पराजित भए । त्यस्तै उपमेयरमा एमालेकी मायाकुमारी खड्काले ४ हजार ७२७ र कांग्रेसकी रिता शाहीले ३ हजार ७५५ मत ल्याए ।
मेयरमा १ हजार ३ र उपमेयरमा ९७२ मतको फरकले एमालेको जित हासिल भएको हो । नगरपालिकामा रहेको १० वडा मध्य ७ वडा एमालेले जित हासिल गरेको हो भने ३ वटा वडा नेपाली काग्रेसले जितको हो ।
३० वैशाखमा भएको मतदानमा धाँधली भएको भन्दै निर्वाचन आयोगले रद्द गरेर २३ असारमा पुनः मतदान गराएको थियो ।