कांग्रेस नेता मेहता एमालेमा प्रवेश
काठमाडौँ,फागुन ७ । स्थानीय तह निर्वाचनको मिति नजिकिँदै जाँदा मधेसका हस्तिहरु नेकपा (एमाले)मा प्रवेश गर्न थालेका छन् ।
स्थानीय तहका निर्वाचित जनप्रतिनिधिहरु कार्यकाल सकिने पूर्वसन्ध्यामा एमाले प्रवेश गरिरहेका बेला सुनसरीको इनरुवा नगरपालिकाका पराजित मेयर उम्मेदवार मनोजकुमार मेहता शुक्रबार एमालेमा प्रवेश गरेका हुन् ।
इनरुवाका प्रभावशाली युवा नेता तथा व्यवसायी मेहता एमालेका अध्यक्ष केपी शर्मा ओलीको निवास बालकोट पुगेर पार्टी प्रवेश गरेका हुन् ।
एमाले सुनसरीका अध्यक्ष रेवतीरमण भण्डारीको उपस्थितिमा भएको पार्टी प्रवेश कार्यक्रममा मेहतालाई अध्यक्ष ओलीले टीका, माला र खादा लगाएर स्वागत गरेका थिए ।
नेपाली कांग्रेसको राजनीतिमा लामो समय बिताएका मेहता पछिल्लो स्थानीय तह निर्वाचनमा मधेसी जनअधिकार फोरम लोकतान्त्रिकबाट मेयरको उम्मेदवार थिए । फोरम लोकतान्त्रिक कांग्रेसमा विलय भएसँगै उनी पुनः कांग्रेसमा क्रियाशील थिए ।