पाँचथरमा आगलागी, तीन घर जलेर ध्वस्त

पाँचथर,पुस २२ । जिल्लाको फालेलुङ गाउँपालिका–६ बरभञ्ज्याङमा बुधबार बेलुकी आगलागी हुँदा तीन घर जलेर ध्वस्त भएको छ ।

बरभञ्ज्याङका जीतबहादुर मेयोङ्बाको घरबाट सुरु भएको आगलागी फैलँदा त्यहाँका रामजीत राई र मनबहादुर राईका घर समेत जलेर नष्ट भएको हो ।

स्थानीयवासी खगेन्द्र राईका अनुसार आगलागीमा तीन घरमा रहेको आइएमईको कार्यालयसहित आधा दर्जन बढी पसल जलेको छ । आगलागी नियन्त्रणका लागि फिदिममा रहेका दुई दमकलको सहायता लिइएको थियो । बरभञ्ज्याङ फालेलुङ–६ को केन्द्रका रुपमा रहेको बजार हो । आगलागीको कारण विद्युत् सर्ट भई सुरु भएको हुनसक्ने स्थानीयको अनुमान छ।