कपिलवस्तु महाराजगन्जलाई डोरी तान प्रतियोगिताको उपाधी
कपिलवस्तु,पुस ९ । कपिलवस्तु जिल्ला स्तरीय डोरी तान प्रतियोगिता सम्पन्न भएको छ । जिल्लाको कृष्णनगर नगरपालिका वडा ८ बहादुरगंजमा भएको प्रतियोगितामा पुरुष तर्फ महारजगञ्ज नगरपालिका प्रथम भएको छ । मायादेवी गाउँपालिले द्धितिय र बुद्धभूमि नगरपालिकाले तृतीय स्थान हासिल गरेका छन् ।
महिला तर्फ वाणगंगा नगरपालिका प्रथम,बिजयनगर गाउँपालिका द्धितिय र शुद्धोदन गाउँपालिकाले तृतीय स्थान हासिल गरेको जिल्ला डोरी तान सङ्घका अध्यक्ष मीनराज बेल्वासेले बताउनुभयो। जिल्लाको शिवराज नगरपालिका बाहेक अन्य ९ पालिकाका पुरुष र महिला समूहको सहभागिता रहेको थियो ।
गत वर्ष प्रथम स्थान पाएको पालिकामा कार्यक्रम गर्ने नियमानुसार यस वर्ष कृष्णनगर नगरपालिका क्षेत्रमा उक्त कार्यक्रम आयोजना गरेको अध्यक्ष बेल्वासेले बताउनुभयो ।कार्यक्रममा कृष्णनगर नगरपालिकाका प्रमुख रजत प्रताप शाहले गत वर्ष बिजेता भएर नगरको शान राखेकोले यस वर्ष नगरमा कार्यक्रम गरिएको बताउनुभयो । डोरी तान प्रतियोगिताले खेलाडी थप उर्जा दिनुका साथै खेल तर्फ आर्कषण गराउने बताउनुभयो ।
जिल्ला डोरी तान सङ्घ कपिलवस्तुको आयोजनामा भएको उक्त प्रतियोगितामा मैत्रीपूर्ण खेलको लागि भारतका दुई समूह पनि सहभागी भएका थिए । खेलले खेलाडीहरू बिच आत्मीयता सँगै खेलको विकासमा मद्दत पुग्ने जनाइएको छ । खेलमा प्रथम पुरस्कार १५ हजार मेडल,द्धितिय पुरस्कार १२ हजार मेडल,र तृतीय पुरस्कार १० हजार मेडल प्रदान गरिएको छ ।