जिल्ला लिग फुटबलको उपाधी न्यु स्टारलाई
नुवाकोट,पुस १ । जिल्ला लिग छनौट फुटबल प्रतियोगिताको उपाधी न्यु स्टार क्लबले हात पारेको छ। नुवाकोट फुटबल संघको आयोजनामा भएको लिग छनौट खेलको फाईनल खेलमा न्यु स्टार क्लबले म्यागङ गाउँपालिका युथ क्लबलाई १-० ले पराजित गर्दै उपाधी जितेको हो ।
नुवाकोट आदर्श बहुमुखी क्याम्पसको खेल मैदानमा भएको खेलको पहिलो हाफमा न्यु स्टारका जर्सी नम्बर ७ का रुपेश मगरले एक गोल गरे । उनले गरेको गोल नै खेलको निर्णायक गोल भयो । म्यागङ क्लबले टस जितेर खेल सुरु गरेका थियो ।
न्यु स्टारको लागि प्रतिक लामा र म्यागङको लागि अजय वाईबाले कप्तानी भूमिकाले खेलेका थिए ।
न्यू स्टारले सेमीफाईनलमा बट्टार युथ क्लबलाई १-० र म्यागङले गद्खार युथ क्लबलाई २-१ गोलले पाखा लगाउँदै फाईनल प्रवेश गरेको थियो ।
प्रतियोगिताको फाईनलमा प्रवेश गरेका दुवै टिमले गतवर्ष सम्पन्न भएको भएको जिल्ला लिगको अन्तिम ८ मा परेका क्लबहरुसँग प्रतिष्पर्धा गर्नेछ । जिल्ला लिग यहि पुष ७ गतेदेखि शुरु हुने नुवाकोट फुटबल संघले जनाएको छ ।
प्रतियोगितामा सहभागी भएका ११ क्लबहरुलाई दुई समुहमा विभाजन गरि नकआउट प्रतिष्पर्धा गराइएको थियो ।