नुवाकोट पञ्चकन्या तेस्रो चेयरमेन कप भलिबल प्रतियोगिता: उद्घाटन सरकार प्रमुख तामाङले गर्ने
नुवाकोट,मंसिर २९। जिल्लास्थित पञ्चकन्या गाउँपालिकाको आयोजनामा आजदेखि पुस ३ गतेसम्म अन्तरपालिकास्तरीय ‘तेस्रो चेयरमेन कप भलिबल प्रतियोगिता हुने भएको छ।
‘खेल र खेलाडीबाट सिकौं अनुशासन र स्वाभिमान, समृद्ध पञ्चकन्या निर्माण हाम्रो अभियान’ भन्ने नारासहित भलिबल प्रतियोगिता हुन लागेको पञ्चकन्या गाउँपालिकाले जनाएको छ । पञ्चकन्या गाउँपालिकाका अध्यक्ष तेजबहादुर तामाङका अनुसार प्रतियोगिताको तयारी पुरा भएको र आगन्तुक अतिथिको स्वागतका लागि ठाउँ ठाँउमा तुल तथा ब्यानरसहित स्वागतद्वार राखिएको छ।
गाउँपालिकाको वडा २ मा रहेको कालिका माध्यमिक विद्यालयको प्रांगणमा हुने प्रतियोगताका लागि मंगलबार अबेरसम्म टिम दर्ता भैसकेको छ । गतवर्षमा केन्द्रिय सरकार तथा मुख्य राजनीतिक दलका नेताद्वारा उद्घाटन भैरहेको प्रतियोगितामा यसवर्ष भने कुनै दल तथा नेता सहभागी नहुने भएका छन् । पञ्चकन्या गाउँपालिकाका अध्यक्ष तेजबहादुर तामाङले साझापथसंगको कुराकानीमा भने- ‘ सधै कति नेतालाई बोलाउने?यसवर्ष स्थानीय सरकारले उद्घाटन गर्द्छ।’
पुष ३ गते समापन हुने प्रतियोगितामा प्रथमलाई १ लाख, द्वितीयलाई ७५ हजार र तृतीयलाई ५० हजार रुपैयाँ पुरस्कार दिइनेछ ।